آلٹ نیوز کے شریک بانی محمد زبیر گرفتار

سوشیل میڈیا پر جھوٹے اور گمراہ کن پوسٹس اور پروپگنڈوں کا پردہ فاش کرنے والے پورٹل آلٹ نیوز کے شریک بانی اور صحافی محمد زبیر کو دہلی پولیس نے گرفتار کرلیا ہے۔

حیدرآباد: سوشیل میڈیا پر جھوٹے اور گمراہ کن پوسٹس اور پروپگنڈوں کا پردہ فاش کرنے والے پورٹل آلٹ نیوز کے شریک بانی اور صحافی محمد زبیر کو دہلی پولیس نے گرفتار کرلیا ہے۔

محمد زبیر کو دہلی پولیس نے پیر کی شام گرفتار کیا۔ ان پر مذہبی جذبات کو ٹھیس پہنچانے اور دشمنی کو فروغ دینے کے الزامات عائد کئے گئے ہیں۔

آلٹ نیوز کے شریک بانی پرتیک سنہا نے کہا کہ محمد زبیر کو ایک مختلف کیس میں پوچھ گچھ کے لیے دہلی بلایا گیا تھا لیکن موقع پر ہی مقدمہ درج ہونے کے بعد انہیں گرفتار کر لیا گیا۔

واضح رہے کہ بی جے پی کی سابق ترجمان نپور شرما کی جانب نے پیغمبر اسلام حضرت محمد مصطفیٰ صلی اللہ علیہ و سلم کی شان میں گستاخی کا معاملہ محمد زبیر نے ہی اٹھایا تھا۔ انہوں نے نپور شرما اور ٹائمز ناؤ کی ایڈیٹر ناویکا کمار کا ویڈیو ٹویٹر پر شیئر کیا تھا جس میں نہ صرف نپور شرما بلکہ ناویکا کمار بھی پیغمبر اسلام کی شان میں گستاخی کرتی ہوئی دیکھی گئی تھی۔

اس ویڈیو کے ٹویٹر پر شیئر ہونے کے بعد نہ صرف ہندوستان بلکہ پوری دنیا کے مسلمانوں میں برہمی کی لہر دوڑ گئی اور عالم عرب کی حکومتیں جب حرکت میں آئیں تو بی جے پی کو نہ صرف نپور شرما بلکہ پارٹی کے ایک اور لیڈر نوین جندل کو ان کے عہدوں سے برطرف کرنا پڑا۔ نوین جندل کو تو پارٹی سے ہی نکال دیا گیا تھا۔

اس دوران دھرم سنسد کے نام پر مسلمانوں کی نسل کشی کی باتیں کرنے والے خودساختہ دھرم گرؤوں بالخصوں یتی نرسنگھا نند اور مسلمان عورتوں کی کھلے عام عصمت ریزی کی دھمکیاں دینے والے بجرنگ منی و دیگر نے دہلی پولیس میں محمد زبیر کے خلاف یہ کہہ کر شکایت دراج کرائی کہ ان کے ٹویٹس سے ہندؤوں کے جذبات کو ٹھیس پہنچی ہے۔ وہ ہندو سادھو سنتوں کو اپنے ٹویٹس میں ہیٹ مونگر یعنی نفرت پھیلانے والے کہہ کر مخاطب کرتے ہیں۔

دہلی پولیس نے اگرچہ ایف آئی آر درج کرلی تھی تاہم محمد زبیر کو گرفتار نہیں کیا گیا تھا۔ آج انہیں گرفتار کرلیا گیا۔ مزید تفصیلات کا انتظار ہے۔

تبصرہ کریں

Back to top button