جموں وکشمیر: مشتبہ ڈرون سے گرائے گئے اسلحہ و گولہ بارود بر آمد: پولیس

جموں: جموں وکشمیر پولیس نے پیر کی صبح ضلع سانبہ کے وجے پور علاقے میں مشتبہ ڈرون سے گرائے گئے ایک پاکیٹ سے اسلحہ و گولہ بارود کی ایک کھیپ بر آمد کرنے کا دعویٰ کیا۔

پولیس ذرائع نے بتایا کہ کچھ مشتبہ مواد کی موجودگی کے بارے میں اطلاع موصول ہوتے ہی سانبہ پولیس کی ایک ٹیم جائے موقع کی طرف روانہ ہوئی۔

انہوں نے کہا کہ پولیس ٹیم نے تلاشی آپریشن شرع کر دیا جس دوران جھاڑیوں کے نزدیک زرد رنگ کا ایک پیکٹ بر آمد کیا گیا۔

ان کا کہنا تھا کہ پاکیٹ سے تین چینی پستول،6 میگزین،48 گولیاں اور4 ہینڈ گرینیڈ بر آمد کئے گئے۔

دریں اثنا پولیس اس ضمن میں تحقیقات کر رہی ہے اور بم ناکارہ بنانے والی ایک ٹیم کو بھی جائے موقع پر طلب کیا گیا ہے۔

انہوں نے کہا کہ علاقے میں تلاشی آپریشن ہنوز جاری ہے۔