سری نگر کی تاریخی جامع مسجد سمیت کئی عبادت گاہیں مسلسل خاموش

نماز جمعہ کی ادائیگی کے لئے آنے والے نمازیوں کا کووڈ ایس او پیز پر مکمل عمل آوری کے باوجود گزشتہ تین جمعہ سے کشمیر کی سب سے بڑی عبادت گاہ مرکزی جامع مسجد میں نماز جمعہ ادا کرنے کی اجازت نہیں دی جا رہی ہے۔

جموں: سری نگر کے پائین شہر میں واقع تاریخی جامع مسجد اور کچھ دیگر مرکزی حیثیت کی مساجد اور خانقاہوں کے محراب و منبر مسلسل تیسرے جمعہ کو بھی خاموش رہے۔

جامع مسجد سری نگر کا انتظام و انصرام چلانے والی انجمن اوقاف کے ایک ترجمان نے بتایا کہ آج علی الصبح انتظامیہ کے اعلیٰ افسران کی جانب سے مرکزی جامع مسجد کے خطیب و امام مولانا احمد سعید نقشبندی کو اطلاع دی گئی کہ آج بھی مرکزی جامع مسجد سری نگر میں نماز جمعہ ادا کرنے کی اجازت نہیں ہے۔

کووڈ متاثرہ کیسس کے پھیلاؤ سے بچنے کےلئے احتیاطی تدابیر کے طورپر حکام نے سری نگر میں واقع حضرت بل کے مزار پر اجتماعی نماز جمعہ کی اجازت نہیں دی۔

انہوں نے کہا: ‘اس حوالے سے انتظامیہ کی جانب سے جامع مسجد کے گیٹ پر باضابطہ طور پر نوٹس بھی چسپاں کیا گیا ہے’۔
ترجمان نے اس امر پر افسوس کا اظہار کیا کہ نماز جمعہ کی ادائیگی کے لئے آنے والے نمازیوں کا کووڈ ایس او پیز پر مکمل عمل آوری کے باوجود گزشتہ تین جمعہ سے کشمیر کی سب سے بڑی عبادت گاہ مرکزی جامع مسجد میں نماز جمعہ ادا کرنے کی اجازت نہیں دی جا رہی ہے۔
ان کا مزید کہنا تھا: ‘یہ حد درجہ افسوسناک اور قابل تشویش ہے۔ نماز کی اجازت نہ دینا عوام اور نمازیوں کے لئے انتہائی تکلیف دہ ہے’۔

اس دوران نوہٹہ، جہاں تاریخی جامع مسجد واقع ہیں، کے مکینوں نے یو این آئی اردو کو بتایا کہ پولیس اہلکاروں نے آج مسلسل تیسرے جمعے کو بھی صبح کے وقت ہی اس عبادت گاہ کے اندر جانے والے ریاستوں کو بند کر دیا۔ان کا مزید کہنا تھا: ‘صرف جامع مسجد کو بند کیا گیا تھا جبکہ جامع مارکیٹ سمیت تمام نزدیکی بازار کھلے تھے’۔

تاریخی جامع مسجد کی طرح آثار شریف درگاہ حضرت بل، تاریخی خانقاہ معلی، آستانہ عالیہ حضرت مخدوم صاحب، آستانہ عالیہ خانیار، آستانہ عالیہ نقشبند صاحب اور دیگر کچھ عبادت گاہوں میں بھی نماز جمعہ ادا کرنے کی اجازت نہیں دی گئی ہے۔تاہم شہر کی چھوٹی جامع مساجد اور دیگر اضلاع کی جامع مساجد میں نماز جمعہ معمول کی طرح ادا کی گئی۔

تبصرہ کریں

Back to top button

Adblocker Detected

Please turn off your Adblocker to continue using our service.