کانگریس کے قائم کردہ نظام کو بی آرایس پارٹی نے تباہ کردیا:ڈپٹی چیف منسٹر ملوبھٹی
ملو بھٹی وکرامارکا نے کہاکہ رورل واٹرسپلائی اسکیم کے تحت43ہزارکروڑروپئے کا خرچ سابق حکومت کی جانب سے کیاگیا۔انہوں نے پوچھا کہ اتنی رقم خرچ کرنے کے باوجود ایک بھی گاوں میں کیا پانی لایاجاسکا؟۔
حیدرآباد:تلنگانہ کے نائب وزیراعلی ملوبھٹی وکرامارکا نے ریمارک کیا کہ کانگریس پارٹی کے قائم کردہ نظام کو بی آرایس پارٹی نے تباہ کردیا۔ریاستی اسمبلی میں گورنر کے خطبہ پر تحریک تشکر مباحث کے دوران سابق وزیرو بی آرایس کے رکن تارک راما راو کی جانب سے کانگریس کے دورحکومت پر کی گئی تنقید پر مداخلت کرتے ہوئے ملوبھٹی وکرامارکا نے کہا کہ ریاست میں کانگریس کی جانب سے جونظام قائم کیاگیا تھا اس کو برباد کرنے کا کام بی آرایس نے کیا ہے۔
انہوں نے کہا کہ بی آرایس نے ریاست میں دس سال حکومت کی۔عوام نے اپنا فیصلہ سنایا۔اس فیصلہ کے مطابق آنے والے دنوں میں ریاست کو کس طرح آگے بڑھانا چاہئے، اس پر تعمیری تجاویز پیش کی جائیں۔حکومت اس پر عمل کرنے کے لئے تیار ہے۔
انہوں نے کہاکہ رورل واٹرسپلائی اسکیم کے تحت43ہزارکروڑروپئے کا خرچ سابق حکومت کی جانب سے کیاگیا۔انہوں نے پوچھا کہ اتنی رقم خرچ کرنے کے باوجود ایک بھی گاوں میں کیا پانی لایاجاسکا؟۔
انہوں نے کہا کہ نلگنڈہ ضلع میں بی آرایس کے دور میں پانی لانے کی بات کی جارہی ہے۔انہوں نے پوچھا کہ کیا اس سے پہلے نلگنڈہ ضلع میں پانی کی سپلائی کیا نہیں ہوتی تھی؟فلورسس کے مسائل کو کیا حل نہیں کیاگیا؟کیا بی آرایس دورمیں ہی اس مسئلہ کو حل کیاگیا؟