لوگوں نے ہمیں اکثریت دی، اب ذمہ داری نبھانے کی باری ہے: بھگونت

اپوزیشن جماعتوں پر طنز کرتے ہوئے مان نے کہا کہ انہوں نے بے بنیاد الزامات اور تبصرے کیے ہیں لیکن لوگوں نے انہیں مسترد کر دیا۔ اب تمام پنجابیوں کو متحد ہو کر پنجاب کے لیے کام کرنا ہو گا۔

موہالی: عام آدمی پارٹی (اے اے پی) کےچیف منسٹر کے عہدہ کے چہرے بھگونت مان نے دھوری اسمبلی سیٹ کو بھاری فرق سے جیتنے اور ریاست میں پارٹی کی جیت کے سونامی کیلئے پنجابیوں کا شکریہ ادا کیا ہے۔ مان نے یہاں اپنی رہائش گاہ پر جمع ہونے والے اجتماع سے خطاب کرتے ہوئے کہا کہ عوام نے اپنی ذمہ داری پوری کر دی ہے اور اب یہ ان کی ذمہ داری ہے کہ وہ اپنی ذمہ داری کو پورا کریں۔

انہوں نے کہا کہ ووٹ دینے والوں کا شکریہ اور نہ دینے والوں کابھی۔ یہ جمہوریت ہے اور ہر کسی کو اپنی سمجھ کے مطابق ووٹ دینے کا حق ہے لیکن اب چیف منسٹر پورے پنجاب کا ہوگا اور کام بلا تفریق ہوگا۔ اب حکومت شہروں سے نہیں دیہاتوں اور وارڈوں سے چلے گی۔ جو افسران دفاتر میں آکر کام کرتے تھے، اور لوگ دفاتر کےچکر لگاتے تھے، وہ اب لوگوں کے گھروں تک پہنچیں گے۔ انتظامیہ کو عوام کے سامنے جوابدہ بنایا جائے گا۔

ریاست میں بے روزگاری کے مسئلہ کے بارے میں انہوں نے کہا کہ اب ان کا سبز قلم حکومت کے پہلے دن سے ہی بے روزگار نوجوانوں کے لیے کام کرے گا۔ نوجوانوں کے ہاتھ میں نشیلی اشیا نہیں بلکہ ٹفن ہوگا تاکہ وہ روزگار کے لیے جائیں۔ انہوں نے کہا کہ حکومت کی حلف برداری کی تقریب شہید اعظم سردار بھگت سنگھ کے آبائی گاؤں کھٹکڑکلاں میں ہوگی جہاں وہ چیف منسٹر کے عہدہ کا حلف اٹھائیں گے۔ انہوں نے کہا کہ ریاست میں تعلیم اور صحت کے بنیادی ڈھانچے پر دہلی کے ریکارڈ پر بڑے پیمانے پر کام کیا جائے گا۔

اپوزیشن جماعتوں پر طنز کرتے ہوئے مان نے کہا کہ انہوں نے بے بنیاد الزامات اور تبصرے کیے ہیں لیکن لوگوں نے انہیں مسترد کر دیا۔ اب تمام پنجابیوں کو متحد ہو کر پنجاب کے لیے کام کرنا ہو گا۔ یوکرین کا ذکر کرتے ہوئے انہوں نے کہا کہ ریاست کے نوجوانوں کی بڑی تعداد تعلیم کے لیے بیرون ملک جاتی ہے کیونکہ یہاں تعلیم مہنگی ہے۔ اب ایسا نہیں ہو گا۔ ریاست میں ہی بہتر تعلیمی انفراسٹرکچر تیار کیا جائے گا۔ نوجوانوں کو تعلیم اور روزگار کے لیے بیرون ملک جانے کی ضرورت نہیں پڑے گی۔

ذریعہ
یواین آئی

تبصرہ کریں

Back to top button