پاکستان اور افغانستان میں زلزلہ، کم از کم 4 افراد ہلاک

اسلام آباد: افغانستان اور پاکستان میں 6.5 کی شدت کے زلزلے کے جھٹکے محسوس کیے گئے جس کے نتیجے میں کم از کم 4 افراد ہلاک اور 150 سے زائد زخمی ہوگئے۔ زلزلے کے جھٹکے نئی دہلی اور نیپال تک بھی محسوس کئے گئے۔

پاکستان کے زلزلہ پیما مرکز کے ذرائع کے مطابق منگل کی شب پاکستان کے مختلف حصوں میں 6.5 شدت کے زلزلے کے جھٹکے محسوس کئے گئے۔

یورپی میڈیٹیرینین سیسمولوجیکل سنٹر (ای ایم ایس سی) کے مطابق زلزلے کا مرکز افغانستان کے کوہ ہندوکش میں تھا۔

ابتدائی اطلاعات میں بتایا گیا تھا کہ زلزلے میں فوری طور پر کسی جانی نقصان کی اطلاع نہیں ملی، زلزلوں کے ساتھ ہی پاکستان کے لوگوں میں خوف وہراس پھیل گیا جو گھروں سے باہر نکل آئے۔

دریں اثنا، چین کے زلزلہ نیٹ ورکس سینٹر کے مطابق، بیجنگ کے وقت کے مطابق چہارشنبہ کی رات 12:47 بجے افغانستان میں 6.9 شدت کے زلزلے کے جھٹکے محسوس ہوئے۔

مرکز نے بتایا کہ زلزلے کا مرکز، 230 کلومیٹر کی گہرائی کے ساتھ، 36.5 ڈگری شمالی عرض البلد اور 70.8 ڈگری مشرقی طول بلد پر مانیٹر کیا گیا۔