گردن میں رسی باندھ کر 8 بائیکس کھینچنے کا خطرناک اسٹنٹ،چند سیکنڈ میں بگڑ گئی صورتحال

نئی دہلی: سوشل میڈیا پر ایک شخص کی جانب سے خطرناک اسٹنٹ کرنے کا ویڈیو تیزی سے وائرل ہورہا ہے، جس میں وہ گردن کے گرد رسی باندھ کر 8 بائیکس کو کھینچنے کی کوشش کرتا نظر آرہا ہے۔ تاہم، چند ہی سیکنڈ میں صورتحال اس وقت بگڑ جاتی ہے جب وہ اچانک بے ہوش ہوکر زمین پر گر پڑتا ہے۔

وائرل ویڈیو میں دیکھا جاسکتا ہے کہ شخص کے بائیں جانب چار اور دائیں جانب چار بائیکس کھڑی ہیں۔ ان بائیکس پر مجموعی طور پر آٹھ افراد سوار ہیں۔ اشارہ ملتے ہی بائیک سوار اپنی گاڑیوں کو آگے بڑھانے لگتے ہیں، جبکہ درمیان میں موجود شخص گردن میں بندھی رسیوں کے ذریعہ انہیں روکنے کی کوشش کرتا ہے۔

ابتدائی تقریباً 10 سیکنڈ تک اسٹنٹ جاری رہتا ہے، لیکن 11ویں سیکنڈ میں شخص گھٹنوں کے بل بیٹھ جاتا ہے اور اگلے ہی لمحے بے ہوش ہوجاتا ہے۔

شخص کو گرتا دیکھ کر دو افراد فوری طور پر اس کی مدد کے لیے پہنچتے ہیں۔ ایک نوجوان اس کی گردن سے رسی نکالنے کی کوشش کرتا ہے، جبکہ دوسرا بائیں جانب موجود چار بائیکس کو آگے بڑھنے سے روکنے کی کوشش کرتا ہے۔

تقریباً 39 سیکنڈ کا یہ ویڈیو سوشل میڈیا پر تیزی سے پھیل رہا ہے۔ ویڈیو کے مناظر کسی میلے یا عوامی تقریب کے معلوم ہوتے ہیں، تاہم واقعہ کہاں اور کب پیش آیا، اس کی تصدیق نہیں ہوسکی ہے۔ اس شخص کی شناخت اور اس کی حالت کے بارے میں بھی فی الحال کوئی مصدقہ اطلاع سامنے نہیں آئی ہے۔

ویڈیو سامنے آنے کے بعد سوشل میڈیا صارفین نے اس خطرناک اسٹنٹ پر تشویش کا اظہار کیا ہے۔ بعض صارفین نے سوال اٹھایا کہ بائیکس کو روکنے کے لیے رسی گردن کے گرد باندھنے کے بجائے ہاتھوں یا بازوؤں کا استعمال کیوں نہیں کیا گیا۔

ایک صارف نے تبصرہ کیا کہ شخص نے خود کو ایسا سمجھ لیا تھا جیسے وہ کسی بالی ووڈ فلم کا ہیرو ہو، جو رسیوں کے ذریعے بائیکس کو روک سکتا ہے۔

اس واقعے نے خطرناک اسٹنٹس کے دوران احتیاط اور انسانی جان کو لاحق خطرات کے حوالے سے بھی بحث چھیڑ دی ہے۔ گردن کے گرد رسی باندھ کر اس طرح کا اسٹنٹ کرنا جان لیوا ثابت ہوسکتا ہے۔