جموں میں طیارے کی شکل کا پاکستانی غبارہ برآمد

جموں: جموں کے سانبہ ضلع میں پولیس نے ایک جہاز نما غبارے کو برآمد کیا ہے جس پر(بی ایچ این) لکھا ہوا تھا۔

سرکاری ذرائع نے بتایا کہ سانبہ ضلع میں جموں پٹھان کوٹ شاہراہ پر مقامی لوگوں نے ایک جہاز نما غبارہ کو دیکھ کر پولیس کو مطلع کیا۔ اس غبارہ پر انگریزی حروف تہجی بی ایچ این کے علاوہ انگریزی میں ہی ایمریٹس اور عربی میں الامارات لکھا تھا۔

انہوں نے بتایا کہ پولیس کی ایک ٹیم فوری طور جائے موقع پر پہنچ گئی اور انہوں نے اس غبارے کو اپنی تحویل میں لے لیا۔

معلوم ہوا ہے کہ پولیس نے اس ضمن میں کیس درج کرکے مزید تحقیقات شروع کی۔

قابل ذکر ہے کہ ہندوستان اور پاکستان کے درمیان جنگ بندی معاہدے کی پاسداری پر اتفاق کے بعد جموں و کشمیر کی سرحدوں پر خاموشی چھائی ہوئی ہے جس سے سرحدی بستیوں کے لوگوں کو راحت نصیب ہوئی ہے تاہم جہاز نما غباروں کی برآمدگی سے ان علاقوں میں سراسیمگی پھیل گئی ہے۔