کلب کی پانچویں منزل سے گرکر 3 سالہ بچے کی موت
مرین ڈرائیو پولیس اسٹیشن کے عہدیدار نے بتایا کہ ہردئے یانشو راٹھوڑ ا نامی متوفی کے آگے چل رہے 11سالہ لڑکے نے کچھ شورسنا۔ جب وہ مڑا تو اس نے پایا کہ چھوٹا لڑکا سیڑھیوں کے بیچ کی خالی جگہ میں گرچکا تھا۔
ممبئی: جنوبی ممبئی کے ایک کلب کی پانچویں منزل سے گرنے کے بعد ایک تین سالہ بچے کی موت ہوگئی جہاں اس کا خاندان فیفا ورلڈ کپ کا فائنل دیکھنے گیا تھا۔
یہ اطلاع پولیس کے ایک عہدیدار نے منگل کو دی۔ اتوار کی شام جب وہ ٹوائلٹ سے لوٹ رہاتھا فرش پر پیر پھسلنے کی وجہ سے وہ سیڑھیوں کی ریلنگ کے درمیان خالی جگہ سے نیچے گرگیا۔
مرین ڈرائیو پولیس اسٹیشن کے عہدیدار نے بتایا کہ ہردئے یانشو راٹھوڑ ا نامی متوفی کے آگے چل رہے 11سالہ لڑکے نے کچھ شورسنا۔ جب وہ مڑا تو اس نے پایا کہ چھوٹا لڑکا سیڑھیوں کے بیچ کی خالی جگہ میں گرچکا تھا۔ اس کے بعد وہ فوری اوپر پہنچا اور اس کی اطلاع لڑکے کے والدین کو دی۔
عہدیدار نے کہا کہ لڑکے کے رشتہ دار اور کلب کے سیکورٹی گارڈ بچے کو قریبی دواخانہ لے گئے جہاں اسے مردہ قرار دیا گیا۔ انہوں نے کہا کہ بچے کی پیشانی اور سر شدید طور پر زخمی ہوگیا تھا۔
عہدیدار نے کہا کہ پولیس نے 11سالہ لڑکے اور سیکورٹی گارڈ کا بیان درج کیا ہے۔ عہدیدار نے بتایا کہ حادثاتی موت کا کیس درج کرکے معاملے کی تفتیش جاری ہے۔
