ضلع عادل آباد میں شیر کی موجودگی سے مقامی عوام میں خوف

حیدرآباد: تلنگانہ کے ضلع عادل آباد کے پیپل کوٹی ریزروائر کے قریب شیر کی موجودگی کے بعد مقامی افراد میں خوف وہراس پایا جاتا ہے۔

اطلاعات کے مطابق جے سی بی ڈرائیور نے اس ریزروائر کے قریب ایک شیر دیکھا۔ اس نے مقامی افراد کو اس بات کی اطلاع دی اور محکمہ جنگلات کے عہدیداروں کو چوکس کیا۔

اس اطلاع کے ساتھ ہی محکمہ جنگلات کے عہدیداروں کے ساتھ ساتھ مقامی افراد کی بڑی تعداد وہاں پہنچ گئی تاہم تب تک شیر وہاں سے جاچکا تھا۔ محکمہ جنگلات کے عہدیداروں نے اس کے پنجوں کے نشانات کی جانچ کی۔

چند دن پہلے ضلع کے اندراولی منڈل میں بھی شیر کی موجودگی کا پتہ چلاتھا جس کے بعد سے اس علاقہ میں شیر کی نقل وحرکت پر مقامی افراد کافی خوفزدہ ہیں جو رات کے وقت اپنے گھروں سے نکلنے میں خوف محسوس کررہے ہیں۔

مقامی افرادنے محکمہ جنگلات کے عہدیداروں سے درخواست کی ہے کہ شیر کو پکڑنے کے اقدامات کریں تاکہ وہ راحت کی سانس لے سکیں۔