نئے راشن کارڈس کی اجرائی ریاستی حکومت کے زیرغور

حیدرآباد: ریاستی وزیر بہبودی پسماندہ طبقات گنگولا کملاکر نے کہا کہ ریاستی حکومت جلد ہی غریبوں کو نئے راشن کارڈ فراہم کرنے پر غور کرے گی۔

انہوں نے کہا کہ تلنگانہ حکومت نے نیشنل فوڈ سیکورٹی ایکٹ (این ایف ایس اے) کے تحت مرکزی حکومت کے ذریعہ فراہم کردہ 53 لاکھ راشن کارڈ کے علاوہ 35 لاکھ راشن کارڈ جاری کئے ہیں۔

اسمبلی میں سیول سپلائیز اور پسماندہ طبقات کی بہبود پر بحث کا جواب دیتے ہوئے وزیر نے کہا کہ جب کہ مرکزی حکومت نے تقریباً 1.9 کروڑ لوگوں کو غریب تسلیم کیا ہے اور انہیں راشن فراہم کیا ہے، تو دوسری طرف ریاستی حکومت کے راشن کارڈ تقریباً 95 لاکھ لوگوں کا احاطہ کرتے ہیں۔

مزید یہ کہ مرکز 3 روپے فی کلو کے حساب سے 5 کلو چاول فی فرد فراہم کرتا ہے۔ تاہم، ریاستی حکومت نے اس پر مزید سبسڈی دی ہے اور تمام 88 لاکھ راشن کارڈ ہولڈرس کے لئے صرف ایک روپیہ فی کلو کے حساب سے 6 کلو چاول فی فرد فراہم کررہی ہے۔

گنگولا کملاکر نے اعلان کیا کہ تمام بی سی ویلفیئر تعلیمی اداروں میں ڈیجیٹل کلاس رومز شروع کئے گئے ہیں جہاں تقریباً 108 ہونہار طلباء کو ای لرننگ کے ذریعے ہارورڈ یونیورسٹی کی فیکلٹی ٹیم کے ذریعے خصوصی تربیت دی جا رہی ہے۔

انہوں نے کہا کہ ریاست میں موجودہ تین ڈگری کالجوں کے علاوہ بی سی ویلفیئر ڈپارٹمنٹ کے تحت 16 نئے ڈگری کالج قائم کئے جائیں گے۔