بریکنگ: کابل کی مسجد میں دھماکہ، کئی ہلاکتوں کا خدشہ

کابل: افغانستان کے دارالحکومت کابل کے شمالی حصے میں ایک مسجد کے اندر دھماکے کے بعد متعدد نمازیوں کی ہلاکت کا خدشہ ہے۔

کابل پولیس کے ترجمان خالد زادران نے بتایا کہ دھماکہ شہر کے کوتل خیرخانہ علاقے میں شام کی نماز کے دوران ہوا۔

زادران نے کہا کہ ہلاکتوں کی صحیح تعداد واضح نہیں ہے لیکن سیکیورٹی فورسز واقعے کی تحقیقات کر رہی ہیں۔

غیر مصدقہ اطلاعات کے مطابق دھماکے میں مسجد کے امام مولوی امیر محمد کابلی سمیت کم از کم 20 افراد جاں بحق اور 40 زخمی ہوگئے۔

واقعے کی ذمہ داری فوری طور پر کسی نے قبول نہیں کی ہے۔

طالبان کے اس دعوے کے باوجود کہ وہ قوم کے لیے سلامتی لے کر آئے ہیں، ملک میں باقاعدگی سے حملے ہو رہے ہیں، جن میں زیادہ تر پر دولت اسلامیہ نے دعویٰ کیا ہے۔

طالبان نے اگست 2021 میں امریکی قیادت میں نیٹو افواج کے اچانک انخلاء کے دوران دوبارہ اقتدار سنبھالا اور اپنی سخت حکمرانی دوبارہ نافذ کی۔ کسی بھی ملک نے ابھی تک سخت گیر حکومت کو تسلیم نہیں کیا ہے۔