سعودی عرب جانے والے مسافروں کیلئے نئی ہدایات

ریاض: سعودی عرب جانیوالے مسافروں کیلئے نئی ہدایات جاری کردی گئیں، سعودی حکومت نے مسافروں کیلئے پاسپورٹ اور ویزا کی اسکین کاپی ساتھ رکھنا لازمی قرار دیدیا۔

سعودی سیول ایوی ایشن گاکا نے مملکت میں داخلے کیلئے نیا سفری ہدایت نامہ جاری کردیا، سعودی ایئر لائن سمیت تمام فضائی کمپنیوں کو نئے سفری ہدایت نامے پر عملدرآمد کرنے کی سخت ہدایات جاری کی گئی ہیں۔

سعودی ایوی ایشن حکام نے سعودی عرب جانیوالے مسافروں کو ہدایت کی ہے کہ مسافر پاسپورٹ اور ویزا کی اسکین کاپی لازمی اپنے پاس رکھیں۔

ایوی ایشن حکام کا کہنا ہے کہ ایئر لائن انتظامیہ ویزا پر پاسپورٹ کے مطابق تفصیلات درج نہ ہونے کی صورت میں مسافروں کو بورڈنگ پاس جاری نہ کریں، غلط کاغذات پر سفر کرنیوالے مسافروں کی رہائش اور واپسی کے اخراجات ایئر لائن انتظامیہ خود برداشت کرے گی۔

سعودی ایوی ایشن کی ہدایت میں مزید کہا گیا ہے کہ ایئر لائن ایسے مسافر کو فوری اگلی ہی پرواز پر واپس بجھوانے کی پابند ہوگی، اس حوالے سے تمام ایئرلائنز اپنے عملے کی ٹریننگ کریں۔ہدایات میں کہا گیا ہے کہ خلاف ورزی کرنیوالی ایئر لائنز پر جرمانہ کیا جائے گا۔