اشوک گہلوٹ اور وسندھرا راجے کووِڈ پازیٹیو

جئے پور: چیف منسٹر راجستھان اشوک گہلوٹ اور سابق چیف منسٹر وسندھرا راجے منگل کے دن کووِڈ پازیٹیو ہوئے۔ دونوں قائدین نے اپنے ٹویٹر ہینڈل پر یہ خبر دی۔ اشوک گہلوت نے کہا کہ گزشتہ چند دن میں ملک بھر میں کووِڈ کیسس بڑھ گئے ہیں۔ میں خود بھی کووِڈ کی زد میں آیا ہوں۔

علامات معمولی ہیں۔ ڈاکٹروں کے مشورہ کے مطابق میں آئندہ چند دن تک اپنے بنگلہ سے کام کرتا رہوں گا۔ آپ سبھی لوگ اپنا خیال رکھیں اور کووِڈ پروٹوکول پر عمل کریں۔

 وسندھرا راجے نے کہا کہ کووِڈ ٹسٹ میں میری رپورٹ پازیٹیو آئی ہے۔ میں نے ڈاکٹروں کے کہنے پر خود کو الگ تھلگ کرلیا ہے۔ میرے رابطہ میں جو بھی لوگ آئے ہوں انہیں چاہئے کہ وہ اپنا ٹسٹ کرالیں اور احتیاط برتیں۔

دونوں قائدین گزشتہ چند دن سے کافی سرگرم تھے۔ اشوک گہلوت جن سنوائی اور دیگر پروگرامس میں ریاست بھر کے لوگوں سے ملاقاتیں کرتے رہے۔ وسندھرا راجے نے اتوار کے دن بی جے پی کور کمیٹی میٹنگ میں شرکت کی تھی۔