ویڈیو: باتھ روب، سر پر تولیہ اور آنکھوں کے نیچے پیچ! میٹرو میں خاتون کی ویڈیو وائرل، حقیقت یا تشہیری مہم؟

نئی دہلی: میٹرو میں سفر کرتی ایک خاتون کی ویڈیو سوشل میڈیا پر تیزی سے وائرل ہورہی ہے، جس میں وہ باتھ روب پہنے، سر پر تولیہ لپیٹے اور آنکھوں کے نیچے انڈر آئی پیچ لگائے بیٹھی نظر آرہی ہے۔

خاتون کا یہ انوکھا انداز دیکھ کر ایسا محسوس ہوتا ہے جیسے اس نے میٹرو کو ہی اسپا (Spa) بنا لیا ہو۔ ویڈیو سامنے آنے کے بعد سوشل میڈیا صارفین دلچسپ تبصرے کررہے ہیں اور اس کے پس منظر پر سوالات اٹھائے جارہے ہیں۔

ویڈیو میں خاتون کے لباس اور انداز کو دیکھ کر ایک صارف نے تبصرہ کیا، ’’کیا یہ سیدھے نہا کر میٹرو میں آگئی؟‘‘

سوشل میڈیا پر اس ویڈیو کو دہلی میٹرو کا بتاکر شیئر کیا جارہا ہے۔ اس سے قبل بھی دہلی میٹرو میں مسافروں کے انوکھے لباس اور غیر معمولی حرکات کے کئی ویڈیوز وائرل ہوچکے ہیں۔ سال 2023 میں بکنی پہن کر میٹرو میں سفر کرنے والی ایک لڑکی کی ویڈیو بھی کافی زیر بحث رہی تھی۔ اسی وجہ سے کئی صارفین اس نئی ویڈیو کو بھی پبلسٹی اسٹنٹ قرار دے رہے ہیں۔

تاہم، ویڈیو میں نظر آنے والی تفصیلات سے اس کی لوکیشن کے تعلق سے الگ ہی امکان سامنے آیا ہے۔ میٹرو کے اندر نصب اسکرین پر ’’Motilal Oswal Malad West‘‘ لکھا دکھائی دیتا ہے۔ اس بنیاد پر قیاس کیا جارہا ہے کہ یہ ویڈیو دہلی کے بجائے ممبئی میٹرو کی یلو لائن سے متعلق ہوسکتی ہے۔

دوسری جانب، ویڈیو کے پس منظر میں سنائی دینے والی آواز اور اس کے پورے سیٹ اپ کو دیکھتے ہوئے اسے کسی برانڈ کی تشہیری مہم کا حصہ ہونے کے امکان سے بھی جوڑا جارہا ہے۔ سوشل میڈیا پر متعدد صارفین اسے پروموشنل ویڈیو قرار دے رہے ہیں۔

تاہم، اس دعوے کی آزادانہ طور پر تصدیق نہیں ہوسکی ہے۔ فی الحال یہ واضح نہیں ہے کہ خاتون نے جان بوجھ کر کسی ریل یا تشہیری مہم کے لیے یہ انداز اختیار کیا تھا یا یہ واقعی میٹرو میں پیش آنے والا کوئی واقعہ تھا۔

میٹرو میں انوکھے لباس اور مسافروں کے عجیب و غریب انداز کے ویڈیوز پہلے بھی سوشل میڈیا پر توجہ حاصل کرتے رہے ہیں، لیکن اس معاملے میں ویڈیو کی اصل لوکیشن اور اس کے پس پشت ممکنہ تشہیری سرگرمی نے تجسس بڑھا دیا ہے۔

اب سوال یہ ہے کہ میٹرو میں خاتون کا یہ انوکھا انداز حقیقت تھا یا کسی تشہیری مہم کا حصہ؟