چیف منسٹر ریونت ریڈی کا کانگریس ووٹروں کے نام حذف کرنے کی سازش کا الزام، ایس آئی آر رجسٹریشن مکمل کرنے کی اپیل

کوڈنگل: تلنگانہ کے وزیراعلیٰ اے ریونت ریڈی نے الزام عائد کیا ہے کہ وہ روزانہ 18 گھنٹے عوامی خدمت اور حکومتی امور میں مصروف رہتے ہیں، لیکن اس کے باوجود بعض عناصر ان کے خلاف سازشیں کرنے میں لگے ہوئے ہیں۔

وزیراعلیٰ نے کوڈنگل میں اسپیشل انٹینسیو ریویژن (SIR) مہم کے تحت خود فارم بھر کر رجسٹریشن کے عمل میں حصہ لیا۔ اس موقع پر خطاب کرتے ہوئے انہوں نے کہا کہ کوڈنگل اسمبلی حلقے میں ایس آئی آر رجسٹریشن کی رفتار تشویشناک ہے اور اس پر فوری توجہ دینے کی ضرورت ہے۔

ریونت ریڈی نے الزام لگایا کہ کانگریس کے حامی ووٹروں کے نام ووٹر فہرست سے حذف کرنے کی سازش کی جا رہی ہے۔ انہوں نے کہا کہ اب تک حلقے میں 78 فیصد ووٹروں کی رجسٹریشن مکمل ہو چکی ہے، جبکہ 22 فیصد ووٹرز کا اندراج ابھی باقی ہے۔

انہوں نے خبردار کیا کہ اگر باقی ووٹرز بروقت ایس آئی آر کے تحت اپنا اندراج مکمل نہیں کرتے تو اس سے ان کی انتخابی کامیابی پر سنگین اثرات مرتب ہو سکتے ہیں۔

وزیراعلیٰ نے عوام، بالخصوص کانگریس کے حامی ووٹروں سے اپیل کی کہ وہ مقررہ مدت کے اندر ایس آئی آر فارم بھر کر اپنی رجسٹریشن مکمل کریں تاکہ ان کے نام ووٹر فہرست میں برقرار رہیں۔