ٹولی چوکی میں آتشزدگی کا واقعہ، مندی کنگ ریسٹورنٹ سے ہوٹل زنیرہ تک پھیلی آگ
شہر کے علاقے ٹولی چوکی میں اتوار اور پیر کی درمیانی شب ایک بڑے آتشزدگی کے واقعے سے سنسنی پھیل گئی۔ مندی کنگ ریسٹورنٹ میں رات تقریباً 11 بجے سے 12 بجے کے درمیان اچانک آگ بھڑک اٹھی، جس نے دیکھتے ہی دیکھتے شدت اختیار کرلی اور قریب واقع ہوٹل زنیرہ کو بھی اپنی لپیٹ میں لے لیا۔
حیدرآباد: شہر کے علاقے ٹولی چوکی میں اتوار اور پیر کی درمیانی شب ایک بڑے آتشزدگی کے واقعے سے سنسنی پھیل گئی۔ مندی کنگ ریسٹورنٹ میں رات تقریباً 11 بجے سے 12 بجے کے درمیان اچانک آگ بھڑک اٹھی، جس نے دیکھتے ہی دیکھتے شدت اختیار کرلی اور قریب واقع ہوٹل زنیرہ کو بھی اپنی لپیٹ میں لے لیا۔
اطلاعات کے مطابق آگ مندی کنگ ریسٹورنٹ کی دوسری منزل پر واقع کچن کی چمنی سے شروع ہوئی اور تیزی سے پھیلتے ہوئے عمارت کی بالائی منزلوں تک پہنچ گئی۔ بعد ازاں آگ کے شعلے ہوٹل زنیرہ کی چوتھی اور پانچویں منزل تک جا پہنچے، جبکہ شعلے چھٹی منزل تک بلند ہوتے دکھائی دیے۔ دونوں عمارتیں دھویں کے گھنے بادلوں میں گھر گئیں۔
واقعے کے وقت دونوں ریسٹورنٹس میں کئی گاہک موجود تھے، تاہم ہوٹل انتظامیہ اور عملے نے فوری کارروائی کرتے ہوئے ایمرجنسی راستوں کے ذریعے تمام گاہکوں کو بحفاظت باہر نکال لیا۔ احتیاطی طور پر گیس سلنڈروں کو بھی محفوظ مقامات پر منتقل کیا گیا، جبکہ آگ پر قابو پانے کے لیے فائر ایکسٹنگوشرز کا استعمال کیا گیا۔
ہوٹل زنیرہ کے مالک شیرر نے میڈیا سے گفتگو کرتے ہوئے الزام عائد کیا کہ آگ مندی کنگ ریسٹورنٹ کی کچن چمنی سے شروع ہوئی اور ان کے ہوٹل کی بالائی منزلوں تک پھیل گئی۔ انہوں نے کہا کہ زنیرہ میں موجود تمام گاہکوں کو بحفاظت باہر نکال لیا گیا اور اس واقعے میں ان کے ریسٹورنٹ کی کوئی ذمہ داری نہیں ہے۔
اس آتشزدگی کے واقعے میں فی الحال کسی جانی نقصان کی اطلاع نہیں ہے، تاہم دونوں عمارتوں کی متعدد منزلیں متاثر ہوئی ہیں۔ آگ لگنے کی حتمی وجہ اور املاک کو پہنچنے والے نقصان کا تخمینہ ابھی سامنے آنا باقی ہے۔ واقعے کی مزید تفصیلات کا انتظار کیا جا رہا ہے۔