سری سیلم پراجکٹ کے پانچ دروازے کھول کر پانی چھوڑاگیا

حیدرآباد: کَرناٹک اور مہاراشٹرا میں جاری موسلادھار بارش کے نتیجہ میں دریائے کرشنا اور اس کی معاون ندیوں میں زبردست پانی کا بہاو دیکھاجارہا ہے۔

کرشنا پر واقع تلنگانہ اوراے پی کے مشترکہ سری سیلم پراجکٹ میں بھاری مقدار میں پانی داخل ہواجس کے بعد خطرے کو بھانپتے ہوئے حکام نے گزشتہ روز کھولے گئے تین دروازوں کے ساتھ مزید دو دروازے کھولتے ہوئے اب جملہ پانچ دروازوں کو 10 فٹ تک اٹھا دیا ہے، جن سے پانی کا اخراج کیا جا رہا ہے۔

فی الحال بالائی علاقوں سے 2,32,290 کیوسیکس پانی کا بہاؤ جاری ہے جب کہ پانچوں دروازوں اور بائیں و دائیں بجلی گھروں کے ذریعہ مجموعی طور پر 2,01,743 کیوسیکس پانی خارج کیا جا رہا ہے۔

سری سیلم جھیل کی مکمل گنجائش 885 فٹ ہے، جبکہ اس وقت پانی کی سطح 883 فٹ تک پہنچ چکی ہے۔ حکام نے بتایا کہ وہ ہر گھنٹے پانی کے بہاؤ پر نظر رکھے ہوئے ہیں ۔