لال قلعہ 15 اگست تک عام عوام کے لیے بند

نئی دہلی: یومِ آزادی کی 80ویں سالگرہ کی تقریبات کی تیاریوں کے پیش نظر دہلی کے تاریخی لال قلعہ کو 15 جولائی سے 15 اگست تک عام عوام اور سیاحوں کے لیے بند کر دیا گیا ہے۔

آثارِ قدیمہ کے سروے آف انڈیا (اے ایس آئی) کی جانب سے جاری حکم نامے کے مطابق لال قلعہ یومِ آزادی کی تقریبات کے اختتام تک عوامی آمد و رفت کے لیے بند رہے گا۔ یہ فیصلہ تقریب کی تیاریوں اور سخت سکیورٹی انتظامات کو یقینی بنانے کے لیے کیا گیا ہے۔

اے ایس آئی کے ایک سینئر افسر کے مطابق یومِ آزادی کی تقریبات سے قبل ہر سال اسی نوعیت کا حکم جاری کیا جاتا ہے تاکہ انتظامات کو بغیر کسی رکاوٹ کے مکمل کیا جا سکے۔

واضح رہے کہ لال قلعہ یونیسکو کے عالمی ثقافتی ورثے میں شامل ایک تاریخی مقام ہے، جہاں 15 اگست 1947 سے ہر سال بھارت کی مرکزی یومِ آزادی تقریب منعقد ہوتی ہے۔ اس موقع پر وزیرِ اعظم قومی پرچم لہراتے ہیں اور قوم سے خطاب کرتے ہیں۔

حکام کے مطابق 15 اگست کو صرف حکومت کی جانب سے جاری کردہ خصوصی پاس رکھنے والے افراد کو ہی لال قلعہ میں داخلے کی اجازت ہوگی، جبکہ تقریب کے دوران سکیورٹی کے غیر معمولی انتظامات کیے جائیں گے۔