تلنگانہ اور آندھراپردیش میں شب معراج عقیدت و احترام سے منائی گئی،مختلف مقامات پر روح پرور اجتماعات
آقائے نامدار پیغمبر آخر الزماں ﷺ نے مسجد حرام سے مسجد اقصیٰ پھر وہاں سے مقام قاب و قوسین اور لامکان تک کا جو سفر فرمایا تھا اسے اسریٰ اور معراج کہا جاتا ہے
حیدرآباد: تلنگانہ اور آندھراپردیش کی مساجد، زیارت گاہوں اور خانقاہوں میں شب معراج کے سلسلہ میں عظیم الشان اور رُوح پرور اجتماعات ہوئے۔ لاکھوں کی تعداد میں لوگ رات بھر شب خوانی، ذکر واذکار، قرآن خوانی، درودو سلام، نمازوں کی ادائیگی اور محافل میں مصروف رہے۔
اس دوران علمائے کرام نے فلسفہ معراج العالم پر روشنی ڈالی۔شہر حیدرآباد میں چوک کی مسجد،چنچل گوڑہ پلے گراونڈ میں سب سے بڑے اجتماعات منعقد ہوئے جس میں لاکھوں کی تعداد میں لوگوں نے شرکت کی۔
اس موقع پر شہر حیدرآباد کی تاریخی مکہ مسجد کو رنگ برنگی برقی قمقموں سے منور کیا گیا تھا اوراس کے تمام فانوس روشن کردیئے گئے تھے۔
شب معراج کے موقع پر قبرستانوں میں قبور کی زیارت کرنے آنے والوں کے لئے روشنی کا انتظام کیا گیا تھا۔شب معراج اور ہفتہ کی صبح بھی لوگ کثیر تعداد میں قبرستانوں میں اپنے مرحومین کے لئے ایصال ثواب اور ان کی قبور کی زیارت کرتے ہوئے دیکھے گئے۔
انتظامیہ نے اس کیلئے خصوصی انتظامات کئے تھے۔لوگوں نے ا ن روح پرور اجتماعات میں فلسفہ معراج، عظمت معراج، مقاصد معراج اور پیغام معراج کی عالمانہ طرز و انداز میں کی گئی تشریح اور خطابت سے بھر پور استفادہ کیا۔
عمائدین ملت اور زعمائے ملت نے کہا کہ آقائے نامدار پیغمبر آخر الزماں ﷺ نے مسجد حرام سے مسجد اقصیٰ پھر وہاں سے مقام قاب و قوسین اور لامکان تک کا جو سفر فرمایا تھا اسے اسریٰ اور معراج کہا جاتا ہے۔
انہوں نے کہا کہ معراج النبی کا عظیم الشان عملی واقعہ اور بے نظیر معجزہ دراصل انسانی فکر اور شعور کے انقلاب کا نام ہے۔
حضرت محسن انسانیت ﷺکی معراج کے واقعہ سے ہی انسانی دنیا میں تحقیق، تفتیش، تلاش اور جستجو کی تڑپ پیدا ہوئی اور دور حاضر کا انسان چاند اور ستاروں پر کمندیں ڈالنے کا اہل بن سکا۔
انہوں نے کہا کہ معراج کے اہم واقعہ میں بے پناہ عبرت اور نصیحت کے ساتھ ساتھ دعوت و موعظت کے بھی بے شمار پہلو پنہاں ہیں جو ہر دور اور ہر زمانہ میں اہل حق اور اہل فکر کیلئے مشعل راہ ہیں۔ سماج اور معاشرہ کی بگڑتی صورتحال، دین سے دوری، اسلامی شعائر اور دین کی بنیادی تعلیمات سے ناواقفیت، بے راہ روی کے بڑھتے ہوئے منفی رحجانات گھریلو تشدد، منشیات کی وبا اور دین کی آڑ میں بے دینی کو فروغ دینے کی منظم کوششوں پر تشویش کا اظہار کرتے ہوئے علما نے معاشرہ کی ہمہ جہت اصلاح کیلئے باغیرت والدین، اساتذہ،معزز شہریوں اور سماج کے باشعور افراد سے تعاون طلب کیاتاکہ ہماری نئی نسل کا دینی اورتعلیمی مستقبل روشن اور درخشاں ہو اور ایک اسلامی و فلاحی معاشرہ وجود میں آسکے۔
اے پی کے مختلف مقامات پر بھی شب معراج کی مناسبت سے بڑے بڑے اجتماع منعقد ہوئے۔ہزاروں لوگوں نے شب معراج کے روح پرور اجتماعات میں شرکت کی۔
