دن ہوئےچھوٹے، سائنسدان بھی حیران

کیلیفورنیا: اس سال گرمیوں کے موسم میں زمین کی رفتار بڑھنے کی وجہ سے دن قدرے چھوٹے ہو گئے ہیں، جس کی وجہ سے سائنسدانوں کو وقت کے حساب کتاب پر خصوصی توجہ دینی پڑی ہے۔

انٹرنیشنل ارتھ روٹیشن اینڈ ریفرنس سسٹم سروس اور یو ایس نیول آبزرویٹری کے ڈیٹا سے یہ بات سامنے آئی ہے کہ 10 جولائی اب تک کا سب سے چھوٹا دن تھا جو 24 گھنٹے سے 1.36 ملی سیکنڈکم ریکارڈ کیا گیا۔

 ایک اور حیران کن بات جو سامنے آئی وہ یہ تھی کہ 22 جولائی کو دن 24 گھنٹے سے 1.34 ملی سیکنڈ چھوٹا تھا۔ یہی نہیں، اندازہ ہے کہ آنے والے 5 اگست کا دن بھی 24 گھنٹے سے 1.25 ملی سیکنڈ کم ہو سکتا ہے۔

سائنسدانوں کے مطابق، ایک دن کی لمبائی وہ وقت ہے جو زمین اپنے محور پر ایک گردش مکمل کرنے میں لیتی ہے۔ یہ اوسطاً 24 گھنٹے یا 86,400 سیکنڈ ہوتا ہے۔ لیکن حقیقت میں، چاند کی کشش ثقل، زمین پر موسمی تبدیلی اور زمین کے اندرونی کور کے اثر جیسی چیزوں کی وجہ سے زمین کا گھومنا قدرے آگے پیچھے ہوجاتا ہے۔ اس کا اثر یہ ہوتا ہے کہ ایک مکمل گردش عام طور پر 86,400 سیکنڈ سے تھوڑا کم یا زیادہ لیتی ہے – یہ فرق صرف ملی سیکنڈ کا ہے جس کا روزمرہ کی زندگی پر کوئی اثر نہیں ہوتا۔

یہ فرق طویل عرصے میں کمپیوٹر، سیٹلائٹ اور ٹیلی کمیونیکیشن کو متاثر کر سکتے ہیں، یہی وجہ ہے کہ 1955 میں متعارف کرائی گئی جوہری گھڑیوں کا استعمال کرکے وقت کی سب سے چھوٹی تبدیلی کو بھی ریکارڈ کرلیاجاتا ہے۔

جوہری گھڑیاں ویکیوم چیمبر میں رکھے ہوئے ایٹموں کے گھماؤ کو گن کر انتہائی درستگی کے ساتھ 24 گھنٹے کا حساب لگاتی ہیں۔ یہ ٹائم کیپنگ کا عالمی معیار ہے، ساتھ ہی یہ وہ وقت بھی ہے جس پر ہمارے تمام فون اور کمپیوٹرز سیٹ ہوتے ہیں۔

پچھلے سال، 5 جولائی 2024 کو، زمین نے اب تک کا سب سے چھوٹا دن دیکھا، جو 24 گھنٹے سے 1.66 ملی سیکنڈ کم تھا۔ اسکرپس انسٹی ٹیوشن آف اوشینوگرافی میں جیو فزکس کے ایمریٹس پروفیسر اور کیلیفورنیا یونیورسٹی، سان ڈیاگو میں ایک ریسرچ جیو فزیکسٹ ڈنکن اگنیو نے کہا، ’’1972 کے بعد سے، ہم قدرے تیز دنوں کی طرف بڑھ رہے ہیں۔

پچھلے 50 برسوں سے، زمین کا مائع کور بھی سست ہو رہا ہے، جب کہ اس کے گرد ٹھوس زمین کی رفتار تیز ہو رہی ہے۔ ان اثرات کے امتزاج کو دیکھ کر، سائنس دان اس بارے میں قیاس آرائیاں کر رہے ہیں کہ آیا آنے والے دن خاص طور پر کم ہو سکتے ہیں۔