پی ایس ایف کے اسکلز ڈیولپمنٹ ہب کی افتتاحی تقریب، ہنر مندی کے نئے دور کا آغاز۔ سید مظہر الدین حسینی، مجتبیٰ حسن عسکری، عبدالمحی، ڈاکٹر ایم کے ایم ظفر کی شرکت

حیدرآباد: اسکلز ڈیولپمنٹ ہب کا افتتاح آج کے مسابقتی منظر نامے میں ترقی کی منازل طے کرنے کے لیے ضروری ہنر اور تعلیم کے ساتھ نوجوانوں کو بااختیار بنانے کی جانب ایک امید افزا قدم ہے۔ PSF، SEED اور HHF  تنظیموں کی اجتماعی کوششوں سے یہ مرکز قوم کی ترقی کا سنگ بنیاد اور آنے والی نسلوں کے لیے امید کی کرن بننے کے لیے تیار ہے۔

مہدی پٹنم حیدرآباد پر منعقدہ اسکلز ڈویلپمنٹ ہب (SDHub) کی افتتاحی تقریب کے موقع پر مقررین نے ان خیالات کا اظہار کیا۔

اسکلز ڈیولپمنٹ ہب کے بموجب پروفیشنلس سولیڈاریٹی فورم (PSF) کے زیر انتظام اور ہیلپنگ ہینڈ فاؤنڈیشن (HHF) کے ساتھ، سپورٹ فار ایجوکیشن اینڈ اکنامک ڈویلپمنٹ (SEED) کے زیر اہتمام یہ اقدام، کمیونٹی کو بااختیار بنانے اور تعلیمی میدان میں ایک اہم سنگ میل ثابت ہوگا۔

اس تقریب میں SEED کے ایگزیکٹو ڈائریکٹر سید مظہر الدین حسینی، HHF کے منیجنگ ٹرسٹی مجتبیٰ حسن عسکری اور PSF کے صدر عبدالمحی نے بطور مہمان خصوصی شرکت کی۔

ان کی موجودگی نے تعلیمی مواقع کو فروغ دینے میں باہمی تعاون کی کوششوں کی اہمیت کو اجاگر کیا۔ دیگر قابل ذکر شرکاء میں مختلف این جی اوز اور انجینئرنگ اور انٹرمیڈیٹ کالجوں کے بانی اور ڈائریکٹر شامل تھے۔

اس موقع پر جماعت اسلامی ہند حلقہ تلنگانہ کے امیر ڈاکٹر محمد خالد مبشر نے ایک متاثر کن تقریر کی اور اسکل ڈیولپمنٹ ہب کے قیام میں PSF، SEED اور HHF کی مشترکہ کوششوں کی تعریف کرتے ہوئے ان کے لئے دعائے خیر فرمائی اور قوم و ملت کے لئے کی جانے والی ان کوششوں کو عین عبادت قرار دیا۔

SEED کے ایگزیکٹو ڈائریکٹر سید مظہر الدین حسینی نے تعلیم کے ساتھ نوجوانوں کوبااختیار بنانے کے منصوبوں سے واقف کروایا۔HHF کے منیجنگ ٹرسٹی مجتبیٰ حسن عسکری نے HHF اور اس کی انسان دوست کوششوں کے بارے میں پریزنٹیشن پیش کیا۔

PSF کے بنیادی رکن عبدالرزاق نے سامعین کو فورم کے مقاصد اور ایجنڈے سے متعارف کرایا۔ پروگرام کا آغاز حافظ نجیب کی تلاوت قرآن سے ہوا۔PSF کے صدر عبدالمحی نے افتتاحی کلمات ادا کرتے ہوئے معززین اور مہمانوں کا خیرمقدم کیا اور انفرادی ترقی اور معیشت کی ترقی میں ہنر مندی کی اہمیت پر روشنی ڈالی۔

انہوں نے صلاحیت،ہنر اورمہارت کی ترقی کے ذریعے کمیونٹی کو بااختیار بنانے میں PSF کے مشن، ویژن اور کارکردگی پر روشنی ڈالی اور بتایا کہ کس طرح اب تک سو نوجوانوں کی زندگیوں کو تبدیل کرنے میں پی ایس ایف کامیاب ہوئی ہے۔ محمد حماد اعظم نے اس موقع پر بتایا کہ کس طرح پروفیشنلز سولیڈیریٹی فورم (PSF) پیشہ ور افراد کے کیریئر لائف سائیکل میں مددگار ثابت ہورہا ہے۔

انہوں نے PSF کے جاب اینڈ سی وی پورٹل،اتالیق۔متدرب پروگرام، انٹرویو کلینک، کالج کنیکٹس اور کارپوریٹ کنیکٹس پروگرامس سے متعلق بھی معلومات فراہم کیں۔SDHubکے ڈائریکٹر محمد فرقان بیگ نے اسکلس ڈیلیپمنٹ ہب کے بارے میں جامع پریزنٹیشن پیش کیا۔

انہوں نے کہا کہ ایس ڈی ہب کے زریعہ تعلیم اور عملی مہارتوں (ہنر مندی)کے درمیا ن خلاء کو پر کیا جائیگا۔اورنوجوانوں کو روزگار کے بدلتے ضروریات کے تحت تیار کیا جائے گا۔اسکلز ڈیولپمنٹ ہب دراصل ملازمت کے متلاشیوں اور صنعت کی ضروریات کے درمیان فرق کو ختم کرنے اور تربیت یافتہ افراد کو ملازمت کے لیے تیار کرنے کی سعی ہے اور اسکے لئے اعلیٰ معیار کے روزگار پر مبنی پروگرام  ضرورتمندوں کے لئے مفت فراہم کئے جائیں گے۔

تقریب کا اختتام SDHub کی فیکلٹی محترمہ مدیحہ تبسم شیخ کے کلمات ِ تشکر کے ساتھ ہوا۔ انہوں نے تمام حاضرین، اسپانسرز اور منتظمین کا شکریہ ادا کیا۔