کرناٹک میں کانگریس انتخابی وعدوں کو پورا کرے گی۔ اسد الدین اویسی کو امید

حیدرآباد : اے آئی ایم آئی ایم کے صدر اسد الدین اویسی نے اتوار کو کہا کہ انہیں قوی امید ہے کہ ملک کی سب سے قدیم قومی جماعت کانگریس جسے ہفتہ کے روز کرناٹک اسمبلی الیکشن میں زبردست اکثریت کے ساتھ کامیابی ملی ہے‘ انتخابات سے قبل عوام سے کئے گئے تمام وعدوں کو پورا کرے گی۔

کانگریس نے شاندار طریقہ سے اقتدار پر واپسی کرتے ہوئے بی جے پی کو جنوبی ہند کے اس کے واحد ریاست سے بیدخل کردیا۔224 رکنی کرناٹک اسمبلی کے انتخابات 10 مئی کو منعقد ہوئے تھے جس کے نتائج کا اعلان کل کیا گیا۔

جہاں کانگریس نے 135 نشستیں حاصل کیں ہیں۔ وہیں بی جے پی اور سابق وزیر اعظم دیوے گوڑا کی جماعت جنتادل سیکولر کو بالترتیب 66 اور 19 نشستو ں پر کامیابی ملی۔

کانگریس نے انتخابی وعدوں کی تکمیل کی ضمانت دی تھی۔ ان وعدوں میں تمام گھریلو صارفین (گرہاجیوتی) کو ہر ماہ 200 یونٹ برقی کی مفت سربراہی‘ ہر خاندان کی بڑی خاتون (صدر خاندان) کو ماہانہ 2 ہزار کی مالی امداد‘ بی پی ایل کے ہر ایک خاندان کو ہر ماہ 10 کیلو چاول کی مفت فراہمی‘ گریجویٹ بیروز گار نوجوانوں کو دو سال تک ماہانہ فی کس 3 ہزار روپئے کا الاؤنس اور ڈپلومہ ہولڈرس کو فی کس 15 سو روپئے کی امداد(عمر 18 سے 25 سال) اور پبلک ٹرانسپورٹ بسوں میں خواتین کو مفت سفر کے وعدے شامل ہیں۔

کانگریس نے برسر اقتدار آنے کے پہلے دن سے ہی ان وعدوں کو شروع کرنے کا وعدہ کیا تھا۔ کرناٹک کے عوام نے فیصلہ کیا ہے اور کانگریس کو اقتدار سونپا ہے۔ ہم امید کرتے ہیں کہ کانگریس‘ انتخابی وعدوں کو پورا کریں گے جو انہوں نے عوام سے کئے تھے۔

اسد الدین اویسی نے کہا کہ اتر پردیش‘ بہار‘ کرناٹک‘ تلنگانہ‘ مہاراشٹرا‘ جھارکھنڈ اور بنگال میں مجلس کو مستحکم بنانے کا عمل جاری رہے گا۔ کرناٹک اسمبلی الیکشن کے نتائج پر تبصرہ کرتے ہوئے اویسی نے کہا کہ ہم وہاں کامیاب نہیں ہوسکے۔ ہم سخت محنت کریں گے۔