شادی کے نام پر جنسی استحصال، ایک شخص کیخلاف مقدمہ درج
اس نے شادی کا وعدہ کرتے ہوئے لڑکی کا جنسی استحصال کیا جس کے نتیجہ میں لڑکی حاملہ ہوگئی اور اس نے لڑکے کو جنم دیا تاہم لڑکے کو جنم دینے کے بعد کارتک نے اس سے شادی کرنے سے انکار کردیا۔
حیدرآباد: شادی کے نام پر جنسی استحصال کرنے والے ایک شخص کے خلاف پولیس نے معاملہ درج کرلیا۔یہ واقعہ شہر حیدرآباد کے نواحی علاقہ شنکر پلی میں پیش آیا۔پولیس اورمتاثرہ کے مطابق شنکرپلی منڈل کے سری رام نگر کالونی کا رہنے والا کارتک رئیل اسٹیٹ کا کاروبار کرتا ہے۔
اس کی ملاقات ایک کالج میں بی ٹیک کی تعلیم حاصل کرنے والی لڑکی سے ہوگئی۔اس نے شادی کا وعدہ کرتے ہوئے لڑکی کا جنسی استحصال کیا جس کے نتیجہ میں لڑکی حاملہ ہوگئی اور اس نے لڑکے کو جنم دیا تاہم لڑکے کو جنم دینے کے بعد کارتک نے اس سے شادی کرنے سے انکار کردیا۔
کارتک نے اپنے باپ کے ساتھ لڑکی سے ملاقات کی اور کہا کہ یہ بچہ اس کانہیں ہے، بچہ کسی اور کو دے دیا جائے۔اس نے شادی سے بھی انکار کردیا اور کہا کہ اس بچہ کا ڈی این اے ٹسٹ کروایا جائے۔
اس کے باپ نے کہا کہ اپنے بڑے بیٹے کی شادی کے بعد وہ کارتک کی شادی کرے گا۔اس لڑکی نے اس دھوکہ کا علم ہونے کے بعد پولیس سے رجوع ہوکر شکایت کی۔
