اورنگ آباد اور عثمان آباد ناموں کی تبدیلی کو چیلنج کرنے والی تمام درخواستیں بمبئی ہائی کورٹ سے خارج

اورنگ آباد: اورنگ آباد اور عثمان آباد اضلاع کے ناموں کو بالترتیب چھترپتی سمبھاجی نگر اور دھاراشیو کرنے کے فیصلے کو چیلینج کرنے والی تمام عرضیوں کو آج بمبئی ہائی کورٹ نے خارج کردیا۔ مہاراشٹر حکومت نے اورنگ آباد اور عثمان آباد اضلاع کے ناموں تبدیل کرنے کے لیے ایک سرکاری حکم نامہ جاری کیا تھا۔

 ریاستی حکومت کے فیصلے کو بمبئی ہائی کورٹ میں کئی عرضیاں داخل کرکے چیلنج کیا گیا تھا۔ چہارشنبہ کو ان درخواستوں کی سماعت بمبئے ہائی کورٹ کے چیف جسٹس دیویندر اپادھیائے اور جسٹس عارف کی ڈویژن بنچ کے سامنے ہوئی، جس کے بعد ہائی کورٹ نے انہیں مسترد کر دیا۔

بمبئی ہائی کورٹ نے چہارشنبہ کے روز مہاراشٹر حکومت کے نوٹیفکیشن کو برقرار رکھا جس میں سرکاری طور پر اورنگ آباد شہر اور ریونیو علاقوں کے ناموں کو بالترتیب چھترپتی سمبھاجی نگر اور عثمان آباد شہر اور ریونیو علاقوں کو دھاراشیو میں تبدیل کیا گیا تھا۔

چیف جسٹس دیویندر اپادھیائے اور جسٹس عارف ایس ڈاکٹر کی ڈویژن بنچ نے ریاستی حکومت کے تبدیل شدہ ناموں کے نوٹیفکیشن کو چیلنج کرنے والی عرضیوں کو خارج کردیا ہے۔

اورنگ آباد اور عثمان آباد شہروں کے ناموں کے ساتھ ساتھ ریونیو علاقوں (اضلاع، سب ڈویژن، تعلقہ، دیہات) کے ناموں کی تبدیلی کو مختلف رٹ پٹیشنز اور مفاد عامہ پٹیشنز کے ذریعے سے عدالت میں چیلنج کیا گیا تھا،

سابق وزیر اعلیٰ ادھو ٹھاکرے کی مہا وکاس اگھاڑی (ایم وی اے) حکومت نے جون 2022 میں کابینہ کی اپنی آخری میٹنگ کے دوران اورنگ آباد کا نام سمبھاجی نگر اور عثمان آباد شہر کا نام بدل کر دھاراشیو رکھنے کو ہری جھنڈی دی تھی۔

تاہم، اس کے بعد کی شندے-فڑنویس حکومت نے نام کی تبدیلی پر ایک نیا فیصلہ لیا اور اورنگ آباد کا نام بدل کر چھترپتی سمبھاجی نگر رکھ دیا۔

ریونیو ایریاز کا نام بدلنا مہاراشٹر لینڈ ریونیو کوڈ، 1966 کے سیکشن 4 کے تحت ہوتاہے، جو ریاستی حکومت کو کسی بھی ریونیو ایریا کی حدود کو تبدیل کرنے یا ایسے کسی بھی ریونیو ایریا کو ختم کرنے اور نام تبدیل کرنے کی اجازت دیتا ہے۔

24 فروری 2023 کو مرکزی وزارت داخلہ نے اورنگ آباد اور عثمان آباد شہروں کے نام تبدیل کرنے کی منظوری دی، لیکن اس وقت تک اضلاع اور ریونیو حکام کے ناموں کو تبدیل کرنے کا عمل مکمل نہیں ہوا تھا۔

 ریاستی حکومت نے اسی دن ایک مسودہ نوٹیفکیشن شائع کیا جس میں اورنگ آباد اور عثمان آباد کے ریونیو علاقوں کے نام تبدیل کرنے کے لیے عام لوگوں سے اعتراضات طلب کیے گئے۔

اورنگ آباد اور عثمان آباد ریونیو ایریاز کے نام تبدیل کرنے کا باضابطہ طور پر دو ہفتے بعد 15 ستمبر 2023 کو مطلع کیا گیا۔ اس کے بعد ریونیو علاقوں کے نئے ناموں کو چیلنج کرتے ہوئے نئی درخواستیں دائر کی گئیں۔

نام کی تبدیلی کے خلاف درخواستیں اس بنیاد پر دائر کی گئیں کہ فیصلہ لیتے وقت عوامی جذبات کا خیال نہیں رکھا گیا اور ریاست نے آئین کی دفعات کی خلاف ورزی کی۔ مزید الزام لگایا گیا کہ مسلمانوں کے خلاف نفرت پھیلانے اور سیاسی فائدہ حاصل کرنے کے لیے نام تبدیل کیا جا رہا ہے۔

پٹیشن میں دلیل دی کہ نام کی تبدیلی سیاسی محرکات سے کی گئی تھی اور مذہبی اختلاف کو فروغ دیا گیا تھا۔ اورنگ آباد کے نام کی تبدیلی کو چیلنج کرنے والی عرضی گزار نے الزام لگایا کہ مہاراشٹر میں ان تمام شہروں کے نام تبدیل کرنے کی مہم چلائی جا رہی ہے جن کے نام مسلم ہیں۔

تاہم، مہاراشٹر حکومت نے اس دلیل کی تردید کی اور کہا کہ کسی شہر کا نام چھترپتی سمبھاج نگر رکھنے کا کوئی مذہبی رنگ نہیں ہے۔ عثمان آباد کا نام تبدیل کرنے کو چیلنج کرنے والی PIL کی مخالفت کرتے ہوئے اپنے حلف نامہ میں، ریاستی حکومت نے عدالت کو بتایا کہ عثمان آباد شہر کا نام بدل کر دھاراشیو رکھنے کا جشن شہر کے زیادہ تر باشندوں نے منایا۔ حکومت نے مزید دعویٰ کیا کہ اس نام کی تبدیلی سے نہ تو سیکولرازم کی روح کم ہوئی اور نہ ہی کوئی فرقہ وارانہ انتشار پیدا ہوا۔