اے پی: انٹر کی طالبہ کا اغوا

حیدرآباد: اے پی کے منگل گری میں مقامی پولیس اسٹیشن کے حدود میں انٹر کی ایک طالبہ کے اغواکرلیاگیا۔

پولیس کے مطابق متاثرہ خاندان منگل گری میں رہائش پذیر ہے اور ان کی بیٹی وجے واڑہ کے ایک نجی کالج میں انٹرمیڈیٹ کی طالبہ ہے۔ وہ روزانہ گھر سے کالج آیاجایا کرتی تھی۔

بتایا جاتا ہے کہ ہفتہ کی رات دیر گئے چند نامعلوم نوجوان متاثرہ لڑکی کے گھر پہنچے اور اسے زبردستی اپنی موٹر سائیکل پر بٹھا لیا۔ جب ارکان خاندان اور دیگر افراد نے انہیں روکنے کی کوشش کی تو ملزمان نے انہیں دھمکایا اور لڑکی کو لے کر فرار ہو گئے۔

اس اچانک واقعہ سے خاندان کے افراد شدید صدمہ میں آگئے تاہم ہوش سنبھالنے کے بعد انہوں نے فوری طور پر منگل گری ٹاؤن پولیس اسٹیشن میں شکایت درج کروائی۔

متاثرہ والدین نے پولیس کو اپنی بپتا سناتے ہوئے کہا کہ ان کی بیٹی کو نامعلوم افراد نے زبردستی اغوا کر لیا ہے۔ انہوں نے پولیس سے اپیل کی ہے کہ ان کی بیٹی کو بحفاظت بازیاب کرایا جائے اور ملزمین کے خلاف سخت قانونی کارروائی کی جائے۔ پولیس نے اس سلسلہ میں مقدمہ درج کر لیا جانچ شروع کردی۔