تلنگانہ میں آٹو رکشہ کرایوں میں اضافہ، محکمہ ٹرانسپورٹ نے جاری کیے احکامات

حیدرآباد: تلنگانہ محکمہ ٹرانسپورٹ نے آٹو رکشہ کے کرایوں میں نظرثانی کرتے ہوئے نئے کرایوں سے متعلق سرکاری احکامات جاری کردیئے ہیں۔ نئی شرحوں میں کم از کم کرایہ، اضافی فاصلے، انتظار، رات کے سفر اور سامان کے لیے مقررہ چارجز شامل ہیں۔

نئے کرایہ کے مطابق پہلے 1.6 کلومیٹر کے سفر کے لیے کم از کم کرایہ 30 روپے مقرر کیا گیا ہے۔

1.6 کلومیٹر سے زیادہ سفر کرنے پر ہر اضافی کلومیٹر کے لیے 14 روپے وصول کیے جائیں گے۔

انتظار کے دوران مسافروں سے 75 پیسے فی منٹ کے حساب سے چارج کیا جائے گا۔

رات 11 بجے سے صبح 5 بجے کے درمیان سفر کرنے والے مسافروں سے معمول کے کرایے کا ڈیڑھ گنا اضافی چارج وصول کیا جائے گا۔

سامان کے حوالے سے جاری احکامات میں کہا گیا ہے کہ بریف کیس اور ہینڈ بیگ کے علاوہ دیگر سامان کے ہر پیکیج پر 50 پیسے چارج کیا جائے گا۔

مسافروں کو آٹو رکشہ میں زیادہ سے زیادہ 100 کلوگرام تک سامان لے جانے کی اجازت ہوگی۔

محکمہ ٹرانسپورٹ کے مطابق نظرثانی شدہ کرایہ کا مقصد آٹو رکشہ خدمات کے لیے کرایوں کے ڈھانچے کو واضح کرنا اور مسافروں و ڈرائیوروں کے درمیان کرایوں سے متعلق ابہام کو دور کرنا ہے۔