بنگلور کیفے بلاسٹ: تمل ناڈو میں این آئی اے کے چھاپے

چنئی: قومی تحقیقاتی ایجنسی (این آئی اے) نے منگل کے روز چنئی اور ضلع رامناتھورم میں بنگلورکے رامیشورم میں کیفے میں ہونے والے دھماکہ کے سلسلے میں چھاپے مارے۔

یکم مارچ کو کیفے میں ہونے والے آئی ای ڈی دھماکہ میں دس افراد زخمی ہوئے تھے۔  رپورٹوں میں کہا گیا ہے کہ این آئی اے چھاپے کم از کم 4-5 مقامات پر مارے جا رہے ہیں۔

مرکزی وزارت داخلہ کے حکم پر این آئی اے حکام نے اس معاملے میں باضابطہ مقدمہ درج کرکے تحقیقات سنبھالنے کے ایک دن بعد یہ معلوم کرنے کے لیے چھاپے مارے کہ آیا بنگلورکے کیفے دھماکے کا تمل ناڈو میں کسی تنظیم کے ساتھ کوئی تعلق تو نہیں ہے۔

ابتدائی جانچ میں اس دھماکے میں کرناٹک سے باہر کے لوگوں کے ملوث ہونے کا انکشاف ہوا ہے جس کی وجہ سے مرکزی وزارت داخلہ نے اس کی جانچ این آئی اے کو سونپ دی ہے۔

چنئی کے شمالی چنئی میں واقع منناڈے اور متھیالپیٹ میں اور جنوبی ضلع رامناتھ پورم میں بھی چھاپے مارے جا رہے ہیں۔

سی سی ٹی وی فوٹیج کی بنیاد پر پولس نے مجرم کی شناخت کر لی ہے جس نے آئی ای ڈی والے بیگ کو کیفے میں رکھا تھا اور اس کی گرفتاری کے لیے چھاپہ مار کارروائی شروع کر دی ہے۔

حکام کو یہ بھی شبہ ہے کہ مجرم کرناٹک سے کسی پڑوسی ریاستوں میں فرار ہو سکتا ہے۔