بی جے پی نے بی سی ریزرویشن بل کے معاملے میں یوٹرن لے لیا : مہیش کمار گوڑ

حیدرآباد: تلنگانہ پی سی سی صدر مہیش کمار گوڑ نے بی جے پی پر تنقید کرتے ہوئے کہا ہے کہ بی جے پی نے بی سی ریزرویشن بل کے معاملے میں یوٹرن لے لیا ہے۔

انہوں نے یاد دلایا کہ ماضی میں بی آر ایس حکومت نے بی سی طبقات کے لیے 33 فیصد ریزرویشن کو گھٹا کر 22 فیصد کر دیا تھا، جو بی سی طبقات کے ساتھ دھوکہ تھا۔ اب بی جے پی بھی اس بل کی مخالفت کر رہی ہے۔

مہیش کمار گوڑ نے کہا کہ بی جے پی تلنگانہ کے صدر رامچندر راؤ کے بیانات سے واضح ہوتا ہے کہ بی جے پی بی سی ریزرویشن کے خلاف ہے۔ انہوں نے الزام لگایا کہ ریاستی اسمبلی میں بی جے پی نے بل کی حمایت کی، لیکن قومی سطح پر وہ مختلف موقف اختیار کر رہی ہے۔

آج دہلی میں اے آئی سی سی لیڈران سے ملاقات کے بعد میڈیا سے بات کرتے ہوئے مہیش کمار گوڑ نے کہا کہ انہوں نے پارٹی قیادت کو تلنگانہ میں ذات پات کی مردم شماری اور بی سی ریزرویشن بل کے بارے میں تفصیل سے واقف کروایا۔

انہوں نے کہا کہ راہل گاندھی کی تحریک سے ہی تلنگانہ میں ذات پات کی گنتی ممکن ہوئی ہے اور بی سی طبقات کو انصاف دلانا ہی کانگریس کا مقصد ہے۔

مہیش گوڑ نے کہا کہ تلنگانہ حکومت نے بی سی ریزرویشن پر ہر ممکن اقدام کیا ہے اور دو بلز مرکز کو بھیجے گئے ہیں، جو ابھی زیر التوا ہیں۔ اگر مرکز ان بلز کو منظوری نہیں دیتا تو راہل گاندھی کی قیادت میں ملک گیر تحریک چلائی جائے گی۔