بالی ووڈ اداکار عمران خان کو نوٹس، 28 اکتوبر تک ملک چھوڑنے کی ہدایت

ممبئی: بالی ووڈ اداکار اور عامر خان کے بھانجے عمران خان کو ممبئی پولیس کی جانب سے مبینہ طور پر ’لیو انڈیا‘ نوٹس جاری کیا گیا ہے، جس میں انہیں 28 اکتوبر تک ہندوستان چھوڑنے کی ہدایت دی گئی ہے۔ اس خبر کے سامنے آنے کے بعد فلمی حلقوں میں بحث شروع ہوگئی ہے۔

اطلاعات کے مطابق، عمران خان ممبئی کے کرانتی میدان میں چیف الیکشن کمشنر گیانیش کمار کے استعفے کے مطالبے پر منعقدہ احتجاج میں شریک ہوئے تھے۔ انتخابی کمیشن کے خلاف اس مظاہرے میں ان کی شرکت کے بعد پولیس نے امن و قانون کی صورتِ حال میں خلل پڑنے کے خدشے کے تحت انہیں حراست میں لے لیا تھا۔

رپورٹ کے مطابق، عمران خان ہندوستانی شہری نہیں ہیں اور ان کے احتجاج میں حصہ لینے کو پولیس نے ملک میں نافذ قواعد کی خلاف ورزی کے طور پر دیکھا۔ بتایا گیا ہے کہ غیر ملکی شہریوں کی جانب سے سیاسی احتجاج میں شرکت سے متعلق ضوابط کی خلاف ورزی کے الزام میں امیگریشن قانون کے تحت یہ کارروائی کی گئی ہے۔

اطلاعات میں کہا گیا ہے کہ نوٹس کے ذریعے عمران خان کو 28 اکتوبر تک ہندوستان چھوڑنے کی ہدایت دی گئی ہے۔ تاہم، اس معاملے میں پولیس کے باضابطہ بیان اور متعلقہ حکام کی جانب سے مزید تفصیلات سامنے آنے کے بعد ہی کارروائی کی مکمل نوعیت واضح ہوسکے گی۔