’کیسا ہرایا‘ سے شہرت پانے والی مجلس کی کارپوریٹر سحر شیخ کے والد ایکناتھ شنڈے کی شیوسینا پارٹی میں شامل؟
میڈیا رپورٹس کے مطابق، تھانے میونسپل کارپوریشن کے وارڈ نمبر 30 سے منتخب ہونے والی سحر شیخ کے والد یونس شیخ کو شندے کی شیوسینا سے وابستہ کلوا ممبرا کیبل سینا کا صدر مقرر کیا گیا ہے۔ اس سلسلے میں تقرری نامہ بھی سامنے آیا ہے، جس میں ایکناتھ شندے کے آشیرواد کا ذکر کیا گیا ہے۔ اسی وجہ سے ان کی شیوسینا سے وابستگی کے بارے میں سوالات اٹھ رہے ہیں۔
تھانے: مہاراشٹر کے ممبرا میں ’کیسا ہرایا‘ کے جملے سے سوشل میڈیا پر مقبول ہونے والی مجلس اتحاد المسلمین کی کارپوریٹر سحر شیخ کے والد یونس شیخ کی ایکناتھ شندے کی قیادت والی شیوسینا سے وابستگی کی خبریں سامنے آنے کے بعد سیاسی حلقوں میں بحث شروع ہوگئی ہے۔ تاہم، یونس شیخ نے شیوسینا میں شمولیت کی خبروں کی تردید کرتے ہوئے کہا ہے کہ انہیں صرف کیبل اور انٹرنیٹ خدمات سے متعلق ایک عہدہ دیا گیا ہے۔
میڈیا رپورٹس کے مطابق، تھانے میونسپل کارپوریشن کے وارڈ نمبر 30 سے منتخب ہونے والی سحر شیخ کے والد یونس شیخ کو شندے کی شیوسینا سے وابستہ کلوا ممبرا کیبل سینا کا صدر مقرر کیا گیا ہے۔ اس سلسلے میں تقرری نامہ بھی سامنے آیا ہے، جس میں ایکناتھ شندے کے آشیرواد کا ذکر کیا گیا ہے۔ اسی وجہ سے ان کی شیوسینا سے وابستگی کے بارے میں سوالات اٹھ رہے ہیں۔
سحر شیخ تھانے میونسپل کارپوریشن کے انتخابات میں مجلس اتحاد المسلمین کے ٹکٹ پر کامیاب ہوئی تھیں۔ انتخابی کامیابی کے بعد ایک جلسے میں ان کا ’کیسا ہرایا۔۔۔‘ والا بیان سوشل میڈیا پر وائرل ہوا تھا۔ اسی جلسے میں انہوں نے آنے والے وقت میں پورے ممبرا کو سبز رنگ سے بھر دینے کی بات بھی کہی تھی، جس پر مختلف سیاسی حلقوں کی جانب سے تنقید کی گئی تھی۔
یونس شیخ ماضی میں این سی پی رہنما جتیندر آوہاڑ کے حامی سمجھے جاتے تھے، تاہم بعد میں دونوں کے درمیان اختلافات پیدا ہوگئے۔ تھانے میونسپل کارپوریشن انتخابات کے دوران یونس شیخ نے اپنی بیٹی کے لیے شرد پوار کی قیادت والی این سی پی سے ٹکٹ حاصل کرنے کی کوشش کی تھی۔ ٹکٹ نہ ملنے کے بعد سحر شیخ نے مجلس کے ٹکٹ پر انتخاب لڑا اور کامیابی حاصل کی۔
انتخابی کامیابی کے بعد سحر شیخ اور ان کے والد نے جتیندر آوہاڑ پر تنقید کی تھی۔ یونس شیخ نے الزام لگایا تھا کہ آوہاڑ نے ان کی بیٹی کو ٹکٹ دینے سے انکار کیا، لیکن انہوں نے اسے مجلس کے ٹکٹ پر کامیاب کراکر دکھایا۔
اب یونس شیخ کی کلوا ممبرا کیبل سینا کے صدر کی حیثیت سے تقرری اور شیوسینا میں شمولیت سے متعلق متضاد بیانات نے تھانے کی سیاست میں نئی بحث چھیڑ دی ہے۔
