بنگلورو کے کئی اسکولوں کو بم سے اُڑادینے کی دھمکی، والدین پریشان

بنگلورو: کرناٹک کے دارالحکومت بنگلورو شہر کے مختلف علاقوں میں کم از کم 15 اسکولوں کو جمعہ کو گمنام ای میل کے ذریعے بم کی دھمکیاں موصول ہوئیں، جس سے افراتفری مچ گئی۔

ای میل میں لکھا گیا کہ اسکولوں میں بم نصب کیے گئے، جس سے طلباء، والدین اور اسکول کے اہلکاروں میں خوف و ہراس پھیل گیا، جس کے نتیجے میں اسکول انتظامیہ نے احتیاطی اقدام کے طور پر احاطے کو خالی کرا لیا۔

بنگلورو پولیس نے دھمکی آمیز اسکولوں سے موصول ہونے والی اطلاعات کی بنیاد پر کارروائی کی اور یہ معلوم کرنے کے لیے فوری تلاشی آپریشن شروع کیا کہ آیا اسکول کے احاطے میں دھماکہ خیز مواد نصب کیا گیا تھا۔

بنگلورو پولیس کمشنر بی دیانند نے کہا کہ فی الحال یہ ای میل افواہیں لگتی ہیں اور والدین سے اپیل کی کہ گھبرانے کی ضرورت نہیں ہے۔ انہوں نے کہا کہ گزشتہ سال بھی ایک شرارتی عنصر نے شہر کے کئی اسکولوں کو ایسی ہی ای میلز بھیجی تھیں۔

دھمکی آمیز ای میل کی چھان بین کرنے پر پولیس کو پتہ چلا کہ اس کے پیچھے تمل ناڈو سے تعلق رکھنے والے ایک نابالغ کا ہاتھ ہے، جس نے انٹرنیٹ پروٹوکول (آئی پی) ایڈریس کو چھپانے کے لیے ایک پروگرام بنا کر ای میل بھیجنے کے لیے اسی ایپلی کیشن کا استعمال کیا تھا۔

سوشل میڈیا پر پیغام پوسٹ کرنے والے بہت سے اسکولوں میں نیوا اسکول پہلا تھا۔ اسکول نے کہاکہ "ہمیں جمعہ کو اسکولوں میں ایک غیر معمولی صورتحال کا سامنا ہے۔ اسکول کو نامعلوم ذرائع سے دھمکیاں موصول ہوئی ہیں۔ چونکہ ہم اپنے اسکول کے بچوں کی حفاظت کو سب سے زیادہ ترجیح دیتے ہیں، اس لیے ہم نے فوری طور پر طلبہ کو کیمپس سے نکالنے کا فیصلہ کیا ہے۔”

اس میں کہا گیا ہے کہ بچوں کو بم اسکواڈ کے مشورے کے مطابق گھر بھیجا جا رہا ہے۔ ہم خطرے کا اندازہ لگا رہے ہیں اور بچوں کو ان کی حفاظت کے لیے گھر بھیج رہے ہیں۔