بی آرایس حکومت نے غریبوں کے مسائل کو نظرانداز کیا: وزیر اطلاعات پی سرینواس ریڈی

حیدرآباد:تلنگانہ کے وزیراطلاعات پی سرینواس ریڈی نے غریبوں کے مسائل کو نظر انداز کرنے پر پچھلی بی آرایس حکومت کو تنقید کا نشانہ بنایا۔ انہوں نے کہا کہ وہ دن میں 16 گھنٹے خلوص نیت سے کام کر رہے ہیں۔

وزیرموصوف نے کھمم دیہی منڈل کے منگلا گوڈم میں عوامی حکمرانی پروگرام سے خطاب کرتے ہوئے کہاکہ پچھلی حکومت کے دور حکومت میں ریاست کو کافی زیادہ مالی نقصان اٹھانا پڑا۔ اس نے 6.71 لاکھ کروڑ روپے کا قرض لیا ہے۔

 سابق وزیراعلی نے قرض حاصل کرتے ہوئے عمارتیں بنوائیں۔انہوں نے نشاندہی کرتے ہوئے کہاکہ کانگریس حکومت کے اقتدار سنبھالتے ہی کابینہ کے پہلے اجلاس میں 6ضمانتیں منظور کی گئیں۔

یہ کانگریس حکومت کے خلوص کو ظاہر کرتا ہے۔ حکومت بنتے ہی خواتین کو آر ٹی سی بسوں میں مفت سفر کی سہولت فراہم کی گئی۔ ہم نے آروگیہ سری کوریج کو بڑھا کر 10 لاکھ روپے کر دیا۔