کانگریس چائے بیچنے والے کا وزیر اعظم بننا ہضم نہیں کر پا رہی: نریندر مودی

نئی دہلی: اٹھارویں لوک سبھا کی تشکیل کے بعد آج بھارتیہ جنتا پارٹی (بی جے پی) اور قومی جمہوری اتحاد (این ڈی اے)کی پارلیمانی پارٹی کی میٹنگ میں وزیر اعظم نریندر مودی کا خیرمقدم کیا گیا اور وزیر اعظم مودی نے نئی دہلی میں لوک سبھا کی پارلیمانی پارٹی کی میٹنگ میں باوقار رویے اور طرز عمل کے لیے اراکین پارلیمنٹ کا خیرمقدم کیا۔

مودی نے پارلیمنٹ لائبریری بلڈنگ کے جی ایم سی بالیوگی آڈیٹوریم میں منعقدہ این ڈی اے پارلیمانی پارٹی کی میٹنگ کی صدارت کی۔ این ڈی اے کی یہ میٹنگ ایسے وقت میں ہوئی ہے جب پارلیمنٹ کے مشترکہ اجلاس میں صدر دروپدی مرمو کے خطاب پر تحریک شکریہ لوک سبھا اور راجیہ سبھا میں بحث ہو رہی ہے۔

پارلیمانی پارٹی کی میٹنگ میں وزیر اعظم مودی کا ہار پہنا کر شاندار استقبال کیا گیا۔ میٹنگ میں مسٹر مودی نے کانگریس کو تنقید کا نشانہ بنایا۔ انہوں نے این ڈی اے کی جیت پر خوشی کا اظہار کرتے ہوئے کہا کہ لگاتار تین بار جیتنا بڑی بات ہے۔

 پنڈت جواہر لعل نہرو کو آج کے اتنے بڑے چیلنجز کا سامنا نہیں تھا، تب وہ بچ گئے تھے۔ ہمارے سامنے تمام چیلنجوں کے باوجود این ڈی اے کو اتنی بڑی کامیابی ملی ہے ۔

کانگریس کو نشانہ بناتے ہوئے انہوں نے کہا کہ کئی وزیر اعظم ایک خاندان سے بنے اور کچھ سپر پرائم منسٹر بن گئے۔ وہ وزیر اعظم بننے والے چائے بیچنے والے کو ہضم نہیں کرپا رہے ہیں ، اس لیے وہ ہم پر بار بار حملہ کرتے ہیں۔

مودی نے نئے اراکین پارلیمنٹ کو مشورہ دیا کہ وہ دہلی کے ورک کلچر اور میڈیا میں بیان دینے سے گریز کریں۔ وزیراعظم نے نئے اراکین پارلیمنٹ سے اپیل کی کہ وہ پارلیمنٹ کی کارروائی میں زیادہ سے زیادہ حصہ لیں۔ اپنے لوک سبھا حلقہ کے مسائل اٹھائیں۔

 تمام اراکین پارلیمنٹ کو ملک کی خدمت کو مقدم رکھنا ہوگا۔ اراکین پارلیمنٹ کو مناسب رویہ اور طرز عمل برقرار رکھنا چاہیے۔ ساتھ ہی اراکین پارلیمنٹ کو پارلیمنٹ کے ضابطے کے مطابق برتاؤ کرنا چاہیے۔ ممبران پارلیمنٹ کو چاہیے کہ وہ ان موضوعات کو شیئر کریں جن میں ان کی خصوصی دلچسپی ہو۔

 انہوں نے کہا کہ ہر رکن پارلیمنٹ کو اپنے خاندان کے ساتھ وزیراعظم میوزیم کا دورہ کرنا چاہئے۔ ہر رکن پارلیمنٹ کو اپنی جڑوں سے جڑا رہنا چاہیے۔ اِدھر اُدھر تقریریں کرنے کی بجائے مناسب فورم پر اپنے خیالات پیش کرنا بہتر ہے۔

میٹنگ کے بعد پارلیمانی امور کے وزیر کرن رجیجو نے کہا "آج وزیر اعظم نے ہمیں ایک منتر دیا جو بہت اہم ہے۔ مسٹر مودی نے این ڈی اے کے اراکین پارلیمنٹ پر زور دیا کہ وہ پارلیمنٹ کے ضابطے، پارلیمانی جمہوریت کے نظام اور طرز عمل کی پیروی کریں جو کہ ایک اچھا پارلیمنٹرین بننے کے لیے ضروری ہے۔

 وزیر اعظم کی طرف سے یہ رہنمائی تمام ممبران پارلیمنٹ کے لیے ایک اچھا منتر ہے، خاص طور پر پہلی بار آنے والے ممبران پارلیمنٹ کے لیے اس لئے ہم نے اس منتر پر عمل کرنے کا فیصلہ کیا ہے۔