سنگاریڈی میں پینے کے پانی کا بحران، عوام ٹینکروں کے انتظار میں پریشان

سنگاریڈی: تلنگانہ کے ضلع سنگاریڈی کے مرکزی شہر کی کئی کالونیوں میں پینے کے پانی کی قلت شدت اختیار کرتی جارہی ہے۔ پانی کی عدم دستیابی کے باعث مقامی افراد گھڑوں اور ڈرموں کے ساتھ پانی کے ٹینکروں کا انتظار کرنے پر مجبور ہیں۔

اطلاعات کے مطابق کئی کالونیوں میں گھروں تک پانی کی باقاعدہ سربراہی نہیں ہورہی ہے، جس کے نتیجے میں عوام کو روزمرہ ضروریات کے لیے بھی مشکلات کا سامنا کرنا پڑ رہا ہے۔

پانی حاصل کرنے کے لیے خواتین اور دیگر افراد کو طویل وقت تک ٹینکروں کا انتظار کرنا پڑ رہا ہے۔ اس صورتحال نے مقامی خاندانوں کی پریشانیوں میں اضافہ کردیا ہے۔

مقامی عوام نے متعلقہ حکام سے مطالبہ کیا ہے کہ پانی کی قلت کا فوری نوٹ لیتے ہوئے پینے کے پانی کی باقاعدہ سربراہی کو یقینی بنایا جائے تاکہ انہیں روزانہ کی مشکلات سے نجات مل سکے۔