رامنتا پور میں ہائیڈرا کی انہدامی کارروائی، عدالتی حکم نظرانداز کرنے کا الزام

حیدرآباد: رامنته پور میں ہائیڈرا کی جانب سے مبینہ غیر قانونی انہدامی کارروائیوں کے خلاف متاثرہ خاندانوں نے شدید تشویش کا اظہار کیا ہے۔ الزام ہے کہ عدالت کی جانب سے اسٹیٹس کو (جوں کا توں برقرار رکھنے) کا حکم جاری کیے جانے کے باوجود ہائیڈرا حکام انہدامی کارروائی انجام دے رہے ہیں۔

متاثرہ شخص نے بتایا کہ ان کی والدہ نے 1974 میں یہ پلاٹ خریدا تھا اور 1980 میں اس پر مکان تعمیر کیا گیا۔ ان کے مطابق خاندان گزشتہ تقریباً 50 برسوں سے باقاعدگی کے ساتھ پراپرٹی ٹیکس اور میونسپل بلز ادا کرتا آرہا ہے۔

انہوں نے افسوس کا اظہار کرتے ہوئے کہا کہ عدالت نے پہلے فل ٹینک لیول (FTL) کی حدود کا تعین کرنے کی ہدایت دی تھی، لیکن ہائیڈرا حکام اس حکم کو نظرانداز کرتے ہوئے انہدامی کارروائی آگے بڑھا رہے ہیں۔

متاثرہ شخص کا الزام ہے کہ حکام مکان کو FTL حدود میں واقع قرار دے رہے ہیں، جبکہ عدالت کی ہدایت کے مطابق پہلے حدود کی باقاعدہ نشاندہی کی جانی چاہیے تھی۔

اس کارروائی کے بعد متاثرہ خاندان نے حکام کے طرزِ عمل پر سوالات اٹھاتے ہوئے اپنی جائیداد کے تحفظ اور عدالتی احکامات پر عمل درآمد کا مطالبہ کیا ہے۔