تلنگانہ کی آرٹی سی بسوں میں خواتین کا مفت سفر وزیراعظم کو ہضم نہیں ہورہا ہے: پونم پربھاکر

حیدرآباد: تلنگانہ کے وزیرٹرانسپورٹ پونم پربھاکر نے ریاستی حکومت کی جانب سے خواتین کو آرٹی سی بسوں میں مفت سفر کی سہولت کی ضمانت پر وزیراعظم مودی کے تبصرہ پر ردعمل ظاہر کرتے ہوئے کہا کہ خواتین کا مفت بس سفر وزیراعظم کو ہضم نہیں ہو رہاہے۔

انہوں نے کہاکہ بعض ریاستیں وہاں کے حالات کو دیکھتے ہوئے معاشی ترقی کے لیے خواتین کو مفت سفر فراہم کر رہی ہیں۔

انہوں نے کہاکہ تلنگانہ میں کانگریس حکومت کو خواتین کے لیے مفت سفرکی سہولت کے سلسلے میں کوئی پریشانی نہیں ہے۔

ہم روٹس میں اضافہ کریں گے اور نئی بسوں کی تعداد میں اضافہ کر تے ہوئے اس اسکیم کو مزید توسیع دیں گے۔

انہوں نے واضح کیا کہ مزید سہولیات فراہم کرنے کے لیے ہماری کوششیں جاری رہیں گی۔انہوں نے کہاکہ یہ بات درست نہیں کہ صرف مفت بس کی سہولت دینے سے کوئی نقصان ہوتا ہے۔

ایسے چھوٹے مسائل پر بات کر کے وزیر اعظم کو اپنی سطح کو نیچا نہیں کرنا چاہئے۔