جی ایچ ایم سی نے شہری شکایات کیلئے نیا واٹس ایپ نمبر جاری کیا، فوری کارروائی کی یقین دہانی
کمشنر جی ایچ ایم سی آر وی کرنن نے شہریوں سے اپیل کی ہے کہ وہ اپنے علاقوں میں درپیش مسائل کی اطلاع اب براہِ راست واٹس ایپ نمبر 81259 66586 پر بھیج سکتے ہیں۔
حیدرآباد: حیدرآباد میں بڑھتی ہوئی صفائی کی شکایات، تعمیراتی ملبے اور کچرے کے مسائل پر فوری کارروائی کے لیے جی ایچ ایم سی (بلدیہ عظیم تر حیدرآباد) نے ایک نیا واٹس ایپ نمبر جاری کیا ہے۔
کمشنر جی ایچ ایم سی آر وی کرنن نے شہریوں سے اپیل کی ہے کہ وہ اپنے علاقوں میں درپیش مسائل کی اطلاع اب براہِ راست واٹس ایپ نمبر 81259 66586 پر بھیج سکتے ہیں۔
انہوں نے بتایا کہ اس سے قبل صرف مائی جی ایچ ایم سی ایپ کے ذریعہ شکایت درج کرانے کی سہولت موجود تھی، لیکن اب شہری واٹس ایپ کے ذریعے تصاویر، مقام (لوکیشن) اور مکمل تفصیل کے ساتھ اپنی شکایت درج کرا سکتے ہیں تاکہ فوری کارروائی ممکن بنائی جا سکے۔
جی ایچ ایم سی کے مطابق شہری درج ذیل مسائل کی نشاندہی کر سکتے ہیں:
- عمارتوں کے ملبے کا غیر قانونی طور پر سڑک کنارے پھینکنا
- کچرے کے ڈبوں کا اوور فلو ہونا
- جی وی پی پوائنٹس پر جمع شدہ کچرے کی صفائی
ان تمام شکایات کی تصاویر اور لوکیشن کے ساتھ اطلاع دی جا سکتی ہے۔ بلدیہ نے شہریوں سے گزارش کی ہے کہ وہ شہر کو صاف ستھرا رکھنے کے لیے اپنا تعاون جاری رکھیں اور کسی بھی شکایت کی صورت میں واٹس ایپ نمبر پر فوری رابطہ کریں۔
