حماس نے آدھے یرغمالیوں کی رہائی کا معاہدہ مسترد کر دیا: نیتن یاہو

یروشلم: اسرائیلی وزیر اعظم نیتن یاہو نے ہفتہ کی شام کہا کہ حماس نے جنگ کے خاتمے اور غزہ سے اسرائیلی فوج کے انخلاء کا مطالبہ کرتے ہوئے غزہ میں قید نصف یرغمالیوں کو رہا کرنے کی تجویز کو مسترد کر دیا ہے نیتن یاہو نے ایک ریکارڈ شدہ ویڈیو بیان میں کہا کہ ’’اگر ہم اب حماس کے مطالبے کے آگے جھک جاتے ہیں تو جنگ کی تمام کامیابیاں ختم ہو جائیں گی۔‘‘

بیان میں اسرائیلی وزیر اعظم نے اس خیال کو بھی مسترد کر دیا کہ اسرائیل اپنے تمام یرغمالیوں کو رہا کرنے اور پھر جنگ دوبارہ شروع کرکے حماس کو دھوکہ دے سکتا ہے۔ ان کا کہنا تھا کہ عالمی برادری ایسے اقدام کو قبول نہیں کرے گی۔

قبل ازیں، حماس کی مسلح ونگ القسام بریگیڈ نے نئی ویڈیو جاری کی تھی جس میں غزہ میں اسرائیلی یرغمالی کو دکھایا گیا تھا۔

چار منٹ کی ویڈیو میں دکھایا گیا ہے کہ اسرائیلی یرغمال ایلکانا بوہبوٹ لینڈ لائن فون پر اپنے اہل خانہ کو فون پر بات کرکے اپنی رہائی کے لیے کوششیں جاری رکھنے کے لیے کہہ رہے ہیں۔

ریکارڈنگ کے اختتام پر انہوں نے کہا کہ میری طبیعت ٹھیک نہیں ہے، میں موت کے لیے چیخ رہا ہوں، برائے مہربانی میرے لیے یہ کام کر دیں۔

القسام بریگیڈز نے یرغمالیوں کے حوالے سے اپنے اس پیغام کے ساتھ ویڈیو کا اختتام کیاکہ "وہ صرف نئی طاقت کے احساس کے ساتھ واپس آئیں گے۔” تاہم یہ واضح نہیں ہے کہ یہ ویڈیو کب ریکارڈ کی گئی۔

اسرائیلی میڈیا نے اطلاع دی ہے کہ ویڈیو کی ریلیز کے بعد تل ابیب، یروشلم، بیر شیبہ اور حیفہ میں احتجاجی مظاہرے ہوئے جہاں ہزاروں افراد نے حکومت سے مطالبہ کیا کہ وہ بغیر کسی تاخیر کے قیدیوں کی رہائی کو یقینی بنائے۔

ادھر غزہ میں اسرائیل کی فوجی کارروائی جاری ہے۔ اسرائیل کی دفاعی افواج نے ایک بیان میں کہا ہے کہ اس کی مسلح افواج نے ہفتے کے آخر میں جنوبی غزہ کی پٹی کے رفح علاقے میں حماس کے 40 سے زائد عسکریت پسندوں کو ہلاک کیا۔