تالاب کے پانی کا شدید بہاو، دلہے کوکندھوں پر اٹھا کر پارکروایاگیا،ویڈیووائرل ،تلنگانہ کے کریم نگر میں دلچسپ واقعہ

حیدرآباد: تلنگانہ کے کریم نگر ضلع کے گنے ورم گاؤں میں ایک دلچسپ اور غیر معمولی منظر اُس وقت دیکھنے کو ملا جب شدید بارش سے پیدا سیلابی پانی کے باعث دلہا کو اس کے رشتہ داروں نے اپنے کندھوں پر اٹھا کر پار پہنچایا۔

اطلاعات کے مطابق گاؤں کے تالاب کا پانی اوور فلو ہو کر نیچے بہنے والے راستے پر آگیا، جس سے آمد و رفت مکمل طور پر معطل ہو گئی۔

باراتیوں کے مطابق، گاؤں کے لو لیول کلورٹ پر پانی کا بہاؤ اس قدر تیز تھا کہ پیدل یا گاڑی سے گزرنا ممکن نہیں رہا، جس پر فوری فیصلہ کرتے ہوئے کچھ نوجوانوں نے دلہا کو اپنے کندھوں پر اٹھا کر بارات کے ساتھ محفوظ جگہ تک پہنچایا۔

اس موقع پر موجود افراد نے اس واقعہ کی ویڈیو بھی بنائی جو سوشل میڈیا پر وائرل ہو گئی اور مقامی سطح پر یہ واقعہ موضوعِ بحث بن گیا۔

عوام کا کہنا ہے کہ یہ صورتحال کوئی نئی نہیں بلکہ ہر سال برسات کے موسم میں انہیں اسی طرح کی مشکلات پیش آتی ہیں۔ لو لیول کلورٹ کی تعمیر کے بعد سے یہ مسئلہ بار بار اٹھایا گیا ہے لیکن تاحال کوئی مستقل حل فراہم نہیں کیا گیا۔

دیہاتیوں نے الزام عائد کیا کہ مقامی حکام نے متعدد یاد دہانیوں اور شکایتی درخواستوں کے باوجود اس مسئلہ کو سنجیدگی سے نہیں لیا۔ عوام کا کہنا ہے کہ اگر بروقت پل تعمیر نہ کیا گیا تو مستقبل میں کسی بڑے حادثہ کا خدشہ ہے۔

گاوں والوں نے حکومت اور متعلقہ محکموں سے اپیل کی کہ فوری طور پر مضبوط اور اونچا پل تعمیر کیا جائے تاکہ برسات میں آمد ورفت کا سلسلہ بلا رکاوٹ جاری رہ سکے۔