حیدرآباد : تلنگانہ حکومت کے اسپورٹس ایڈوائزر اے پی جتیندر ریڈی نے ہفتہ کے روز بتایا کہ عالمی یومِ خواتین کے موقع پر گچی باؤلی ہاکی اسٹیڈیم میں منعقد ہونے والے ویمنز ہاکی ورلڈ کپ کوالیفائنگ ٹورنامنٹ کے لیے شاندار انتظامات مکمل کر لیے گئے ہیں۔
آٹھ ٹیموں کی کپتانوں کے ہمراہ پریس کانفرنس سے خطاب کرتے ہوئے جتیندر ریڈی نے کہا کہ اس ٹورنامنٹ کا مقصد ہندوستان کے قومی کھیل ہاکی کا احیاء اور کھیلوں میں خواتین کی زیادہ سے زیادہ شرکت کی حوصلہ افزائی کرنا ہے۔ انہوں نے مزید کہا کہ تلنگانہ حکومت کے تعاون سے حیدرآباد اب قومی اور بین الاقوامی کھیلوں کے مقابلوں کے لیے ایک اہم مرکز کے طور پر ابھر رہا ہے۔
اسپورٹس اتھارٹی آف تلنگانہ کی مینیجنگ ڈائریکٹر سونی بالادیوی نے بتایا کہ گچی باؤلی اسٹیڈیم میں تمام انتظامات بین الاقوامی معیار کے مطابق کیے گئے ہیں۔ انہوں نے کہا کہ اس باوقار تقریب کے کامیاب انعقاد کو یقینی بنانے کے لیے اسپورٹس اتھارٹی گزشتہ دو ماہ سے کوشاں تھی۔
آٹھوں ٹیموں کی کپتانوں نے تلنگانہ حکومت کے انتظامات اور مہمان نوازی پر اطمینان کا اظہار کیا اور گچی باؤلی کی ‘ایسٹرو ٹرف’ کو بین الاقوامی ہاکی کے لیے بہترین قرار دیا۔
ٹورنامنٹ میں حصہ لینے والی ٹیموں اور ان کی کپتانوں میں ہندوستان (سلیمہ ٹیٹے)، آسٹریا (جوہانا چیک)، اٹلی (سارہ پگلیسی)، کوریا (یوری لی)، اسکاٹ لینڈ (سارہ رابرٹسن)، یوراگوئے (مینویلا ولر)، ویلز (الیزابتھ بنگہم) اور انگلینڈ (للی واکر اور فلورا پیل) شامل ہیں۔
