میں نے بی جے پی میں اسکولنگ، تلگودیشم میں کالج کیا اور راہول گاندھی کے ساتھ ہوں: ریونت ریڈی

حیدرآباد: تلنگانہ کے وزیراعلی اے ریونت ریڈی نے دلچسپ ریمارک کرتے ہوئے کہا کہ ان کی اسکولنگ بی جے پی، کالج کی تعلیم تلگودیشم میں ہوئی اور اب وہ راہل گاندھی کے ساتھ ہیں۔ اس طرح انہوں نے دلچسپ انداز میں اپنے سیاسی سفر کے بارے میں بتایا۔

 انہوں نے حیدرآباد میں ہریانہ کے گورنر بنڈارو دتاتریہ کی کتاب کی رسم اجراء کی تقریب سے خطاب کرتے ہوئے اپنے سیاسی کیریر کے بارے میں دلچسپ تبصرہ کیا۔ انہوں نے کہا ”میرے دتاتریہ اور مرکزی وزیر کشن ریڈی سے خاندانی تعلقات ہیں۔

 میں نے بی جے پی میں اسکولنگ کی۔ تلگودیشم میں کالج کیا اور میں راہل گاندھی کے ساتھ کام کررہا ہوں۔ میں نے کبھی اپنے تعلقات کو نہیں چھپایا۔

“ سابق وزیراعظم اٹل بہاری واجپائی سے اپنے گہرے تعلقات کا اظہار کرتے ہوئے کہا کہ جس طرح واجپائی کو قومی سیاست کی اہم شخصیت قرار دیا جاتا ہے اسی طرح دتاتریہ بھی تلنگانہ میں احترام سے دیکھے جاسکتے ہیں۔ تلنگانہ تحریک کے دوران گلے ملنے کے ان کے پروگرام سے جذبہ حاصل ہوا ہے۔

 سیاست میں جو افراد نئے ہیں انہیں مبسوط قیادت کے بارے میں دتاتریہ سے سیکھنا چاہئے۔ انہوں نے ہریانہ کے گورنر کی زندگی اور ان کی وراثت کے بارے میں بھی اظہارخیال کیا۔