اگر آپ کے گھر میں دو LPG کنکشن ہیں تو ہوشیار رہیں۔ آپ کے خلاف سخت کاروائی ہو سکتی ہے۔ ضروری قواعد جان لیں

نئی دہلی: اگر آپ کے گھر میں ایل پی جی (LPG) گیس کے دو کنکشن موجود ہیں تو آپ کو محتاط رہنے کی ضرورت ہے۔ حکومت اور آئل کمپنیوں کے قواعد کے مطابق عام طور پر ایک خاندان کے لیے صرف ایک ہی گیس کنکشن درست مانا جاتا ہے۔ اگر کسی شخص کے نام پر یا ایک ہی پتہ پر دو الگ الگ گیس کنکشن پائے جاتے ہیں تو اس پر کارروائی کی جا سکتی ہے۔

ملک کی بڑی آئل اب جدید سافٹ ویئر سسٹم استعمال کر رہی ہیں۔ اس سسٹم کے ذریعے تمام صارفین کے گیس کنکشن کا ڈیٹا چیک کیا جاتا ہے۔ اگر کسی صارف کے نام یا پتہ پر ایک سے زیادہ کنکشن نظر آتے ہیں تو سسٹم فوراً اس کی نشاندہی کر دیتا ہے۔

دو کنکشن ملنے پر کیا کارروائی ہو سکتی ہے؟

اگر جانچ کے دوران یہ معلوم ہوتا ہے کہ ایک گھر میں دو گیس کنکشن موجود ہیں تو سب سے پہلے دونوں کنکشن عارضی طور پر بلاک کیے جا سکتے ہیں۔ اس کا مطلب ہے کہ صارف کو گیس سلنڈر کی ریفل نہیں ملے گی۔ اس کے بعد صارف کو اپنا کے وائی سی (KYC) اپڈیٹ کرنا پڑتا ہے اور ایک کنکشن بند کروانا ہوتا ہے۔ جب تک یہ عمل مکمل نہیں ہوتا، گیس سروس دوبارہ شروع نہیں کی جاتی۔

سبسڈی واپس لی جا سکتی ہے

اگر کوئی شخص دونوں کنکشن پر حکومت کی گیس سبسڈی حاصل کر رہا ہو تو اسے قواعد کی خلاف ورزی مانا جاتا ہے۔ ایسے معاملات میں حکومت پہلے سے ملی ہوئی سبسڈی واپس مانگ سکتی ہے۔ ضرورت پڑنے پر سود سمیت رقم کی وصولی بھی کی جا سکتی ہے اور آئندہ کے لیے سبسڈی کی سہولت بھی ختم کی جا سکتی ہے۔

ایل پی جی گیس کو ضروری شے سمجھا جاتا ہے اور اس کے استعمال کے لیے کچھ حفاظتی قواعد بھی ہوتے ہیں۔ گیس کنکشن کے ساتھ ملنے والا حادثاتی بیمہ صرف درست اور قانونی کنکشن پر ہی لاگو ہوتا ہے۔ اگر گھر میں غیر قانونی یا بغیر اجازت والا گیس سلنڈر پایا جاتا ہے اور کوئی حادثہ پیش آ جائے تو بیمہ کا دعویٰ بھی مسترد کیا جا سکتا ہے۔

گیس کنکشن سے متعلق قواعد کی پابندی کرنا ضروری ہے۔ وقتاً فوقتاً اپنے کنکشن کی معلومات چیک کرتے رہیں اور اگر دو کنکشن موجود ہوں تو فوراً ایک کو بند کرا دیں، تاکہ مستقبل میں جرمانہ، سروس بند ہونے یا دیگر مشکلات سے بچا جا سکے۔