کرکٹ میدان میں دل کا دورہ پڑنے سے عمران پٹیل جاں بحق (ویڈیو وائرل)

پونے: کرکٹ کے میدان میں ایک افسوسناک واقعہ پیش آیا جہاں ایک کرکٹر دل کا دورہ پڑنے سے انتقال کر گیا۔ یہ واقعہ پونے کے گراواری اسٹیڈیم میں جمعرات کو ہونے والے میچ کے دوران پیش آیا۔ 35 سالہ بلے باز عمران پٹیل، جو اوپنر کے طور پر بیٹنگ کر رہے تھے، اچانک سینے میں درد کی شکایت کرتے ہوئے زمین پر گر پڑے۔

بیٹنگ کے دوران عمران نے سینے میں شدید درد محسوس کیا اور امپائرز کو صورتحال سے آگاہ کیا۔ کھلاڑیوں نے کھیل روک دیا، اور عمران میدان سے باہر جانے کی کوشش کر رہے تھے کہ اچانک گر پڑے۔ فوری طور پر انہیں اسپتال لے جایا گیا، لیکن ڈاکٹروں نے تصدیق کی کہ وہ پہلے ہی وفات پا چکے ہیں۔

یہ واقعہ میچ کی لائیو اسٹریمنگ کے دوران پیش آیا، اور اس منظر کو کیمروں نے قید کر لیا۔ جیسے ہی عمران زمین پر گرے، میدان میں موجود تمام کھلاڑی ان کی مدد کے لیے بھاگے۔

عمران کے ساتھی کھلاڑیوں کا کہنا ہے کہ وہ بالکل صحت مند اور فٹ تھے اور انہیں پہلے سے کسی قسم کی صحت کی شکایت نہیں تھی۔ یہ واضح نہیں ہو سکا کہ انہیں اچانک دل کا دورہ کیوں پڑا۔

عمران پٹیل اپنے علاقہ میں بہت ہی مقبول تھے۔ وہ ایک آل راؤنڈر کھلاڑی تھے اور کرکٹ ٹیم کے مالک بھی تھے۔ کرکٹ کے علاوہ وہ رئیل اسٹیٹ کے کاروبار سے منسلک تھے اور ایک جوس شاپ بھی چلاتے تھے۔ عمران اپنے پیچھے بیوی اور تین بیٹیاں چھوڑ گئے ہیں۔

یہ افسوسناک حادثہ اس بات کی یاد دہانی ہے کہ دل کی صحت کا خیال رکھنا کتنا ضروری ہے، چاہے کوئی بظاہر کتنا ہی صحت مند کیوں نہ ہو۔