لبنان کے پناہ گزین کیمپ میں شدید آتشزدگی،تقریباً 500 افراد بے گھر
عینی شاہدین کے مطابق، آگ نے کیمپ کے تمام 59 خیموں کو اپنی لپیٹ میں لے لیا، جہاں 75 خاندان مقیم تھے۔ آگ تیزی سے پھیلنے کے باعث متاثرہ خاندانوں کو اپنا قیمتی سامان نکالنے کا موقع بھی نہیں ملا۔
زحلہ: لبنان کے مشرقی علاقے وادیٔ بقاع میں شامی پناہ گزینوں کے ایک کیمپ میں شدید آتشزدگی کے نتیجے میں تقریباً 500 افراد بے گھر ہوگئے۔
آگ نے درجنوں خیموں کو اپنی لپیٹ میں لے لیا، جس سے 75 خاندانوں کا سامان اور عارضی رہائش گاہیں تباہ ہوگئیں۔
خبر رساں ادارے انادولو کے مطابق، یہ واقعہ لبنان کے ضلع زحلہ کے قصبے بر الیاس میں پیش آیا، جہاں تقریباً 500 شامی پناہ گزین رہائش پذیر تھے۔
عینی شاہدین کے مطابق، آگ نے کیمپ کے تمام 59 خیموں کو اپنی لپیٹ میں لے لیا، جہاں 75 خاندان مقیم تھے۔ آگ تیزی سے پھیلنے کے باعث متاثرہ خاندانوں کو اپنا قیمتی سامان نکالنے کا موقع بھی نہیں ملا۔
لبنان کی سول ڈیفنس کے مطابق، امدادی ٹیموں نے کارروائی کرتے ہوئے آگ پر قابو پالیا۔ ادارے کی ابتدائی رپورٹ میں 30 خیموں اور ایک گاڑی کے جلنے کی تصدیق کی گئی ہے، جبکہ دھوئیں سے متاثر ہونے والے ایک شخص کو طبی امداد کے لیے الناصرہ اسپتال منتقل کیا گیا۔
