منوبھاکر، اولمپکس کی اختتامی تقریب میں ہندوستان کی پرچم بردار ہوں گی

پیرس: اسٹار خاتون شوٹر منو بھاکر پیرس اولمپکس کی اختتامی تقریب میں ہندوستان کی پرچم بردار ہوں گی۔ منوبھاکر نے پیرس گیمز میں دو کانسی کے تمغے جیت کر تاریخ رقم کی ہے۔

منو نے خواتین کے 10 میٹر ایئر پسٹل مقابلے میں کانسی کا تمغہ جیت کر ان کھیلوں میں ملک کے تمغے کا کھاتہ کھول دیا تھا۔ اس کے بعد انہوں نے سربجوت سنگھ کے ساتھ مل کر 10 میٹر ایئر پسٹل مکسڈ ٹیم ایونٹ میں کانسی کا تمغہ بھی جیتا۔

انڈین اولمپک اسوسی ایشن (آئی او سی) کے ایک عہدیدار نے کہاکہ منوبھاکر کو پرچم بردار کے طورپر منتخب کیاگیا ہے۔

عہدیدار نے کہاکہ منوبھاکر نے شاندار کارکردگی کا مظاہرہ کیاہے۔ اس لئے وہ اس اعزاز کی مستحق ہے۔ اس دوران ہریانہ سے تعلق رکھنے والے 22 سالہ شوٹر نے کہاکہ ہندوستان کا پرچم بردار ہونا ہر ایک کیلئے اعزاز کی بات ہے۔

منو کے علاوہ سواپنل کسلے نے مردوں کی 50 میٹر رائفل 3 پوزیشنز میں ہندوستان کیلئے کانسی کا تمغہ جیتا تھا۔ آئی او سی نے ابھی تک مرد پرچم بردار کا اعلان نہیں کیاہے لیکن خیال کیا جاتا ہے کہ آنے والے دنوں میں اس کا اعلان کیا جائے گا۔