رامنتا پور میں کباڑ کی دکان میں زبردست دھماکہ، مالک شدید زخمی

حیدرآباد: شہر کے علاقے رامنتھا پور کی چرچ کالونی میں اتوار کو ایک کباڑ کی دکان میں زبردست دھماکہ پیش آیا، جس کے نتیجے میں آگ بھڑک اٹھی اور دکان کا مالک شدید طور پر زخمی ہوگیا۔

ابتدائی اطلاعات کے مطابق، کباڑ کی دکان میں دھات کاٹنے کے دوران اچانک دھماکہ ہوا، جس کے بعد آگ لگ گئی۔ اس واقعے سے علاقے میں خوف و ہراس پھیل گیا۔

اس حادثے میں کباڑ کے تاجر پرشورام شدید جھلس گئے۔ اطلاعات کے مطابق، ان کے جسم کا تقریباً 70 فیصد حصہ جھلس گیا ہے۔

زخمی پرشورام کو فوری طور پر ایمبولینس کے ذریعے گاندھی اسپتال منتقل کیا گیا، جہاں ان کی حالت تشویشناک بتائی جارہی ہے۔

واقعے کی اطلاع ملتے ہی فائر بریگیڈ کی دو گاڑیاں جائے وقوعہ پر پہنچ گئیں۔ فائر فائٹرس نے آگ پر قابو پانے کے لیے کارروائیاں شروع کردیں۔

دھماکے کی اصل وجہ تاحال معلوم نہیں ہوسکی ہے۔ واقعے سے متعلق مزید تفصیلات کا انتظار ہے۔