وزیر پونگولیٹی سرینواس ریڈی کا بیتھوپلی تالاب کا دورہ، SDRF عملے کی ستائش

کھمم: تلنگانہ کے وزیر ریونیو، ہاؤزنگ اور اطلاعات و تعلقات عامہ پونگولیٹی سرینواس ریڈی نے ضلع کھمم کے ستھی پلی منڈل میں واقع لبریز بیتھوپلی چیرو (تالاب) کا معائنہ کیا اور راحت و بچاؤ کارروائیوں میں حصہ لینے والے اسٹیٹ ڈیزاسٹر ریسپانس فورس (SDRF) کے جوانوں کی ستائش کی۔

اس موقع پر وزیر نے تالاب کی صورتحال کا جائزہ لیا اور مشکل حالات میں بچاؤ کارروائیوں کو انجام دینے والے SDRF اہلکاروں اور دیگر ٹیموں کو مبارکباد پیش کی۔

واضح رہے کہ شدید بارش کے باعث بیتھوپلی تالاب میں پانی کی سطح بڑھ گئی تھی، جس کے نتیجے میں پھنسے ہوئے ماہی گیروں کو بچانے کے دوران دو ریسکیو کشتیاں الٹ گئی تھیں۔ اس حادثہ میں لاپتہ ہونے والے SDRF اور فائر سرویس کے 11 اہلکاروں کو بعد میں بحفاظت بچا لیا گیا تھا۔

اس ریسکیو آپریشن میں SDRF، فائر سرویس، پولیس اور دیگر متعلقہ حکام نے مشترکہ طور پر حصہ لیا۔

وزیر پونگولیٹی سرینواس ریڈی نے بچاؤ کارروائیوں میں شامل تمام اہلکاروں کی خدمات اور بروقت کارروائی کی ستائش کی۔