مسلم بھائی چارے کو سیاست سے بالاتر رکھنے کی ضرورت: وزیر خارجہ ترکیے

انقرہ: ترکیے کے وزیر خارجہ میولود چاوش اولو نے کہا ہے کہ ہمیں مسلمانوں کے درمیان بھائی چارے کو سیاست سے بالاتر رکھنے کی ضرورت ہے۔

میولود چاوش اولو، جو اقوام متحدہ (یو این) کی 77ویں جنرل اسمبلی کے اجلاس کے لئے نیویارک، میں تھے، نے اسلامی تعاون تنظیم (او آئی سی) کے سالانہ رابطہ اجلاس سے خطاب کیا۔ انہوں نے کہا کہ اہم نتائج صرف اسی صورت میں حاصل کئے جا سکتے ہیں جب مسلم دنیا یکجہتی کے ساتھ کام کرے۔

انہوں نے مزید کہا کہ حقیقت یہ ہے کہ اقوام متحدہ کی جنرل اسمبلی نے 15 مارچ کو ’’’اسلامو فوبیا کے خلاف عالمی دن‘‘ کے طور پر منانے کا فیصلہ کیا ہے جو کہ بڑی اہم مثال ہے۔

انہوں نے کہا کہ قران کا فرمان ہے ’’مومن تمہارے بھائی ہیں اور اپنے بھائیوں کے ساتھ امن میں رہو۔‘‘ ’’ہمیں مسلمانوں کے درمیان بھائی چارے کو سیاست سے بالاتر رکھنے کی ضرورت ہے۔ ہماری آواز صرف اسی صورت میں سنی جا سکتی ہے جب ہم ان مسائل پر مل کر کام کریں جن سے پوری امت کا تعلق ہے۔‘‘

انہوں نے کہا کہ ترکی اپنے فلسطینی بھائیوں کی ٹھوس حمایت جاری رکھے گا ۔انہوں نے کہا کہ ’’یہ ہماری ذمہ داری ہے کہ ہم فلسطین کی ریاست کا دفاع کریں، جو کہ ایک آزاد اور خودمختار ریاست ہے اور مشرقی القدس اس کا دارالحکومت ہے۔‘‘

انہوں نے کہا کہ ترک قبرص کو غیر منصفانہ تنہائی اور پابندیوں کا سامنا ہے اور ہم امید کرتے ہیں کہ او آئی سی کے رکن ممالک قبرصی ترکوں کے ساتھ کھڑے ہوں گے۔ یونان میں مسلم ترک اقلیت بھی اپنے بنیادی حقوق اور آزادیوں سے محروم ہے، انہیں تعلیم میں اپنی نسلی شناخت اور خودمختاری استعمال کرنے کی اجازت نہیں ہے۔ ہم چاہتے ہیں کہ ہمارے بھائی ان کے ساتھ بھی یکجہتی کا اظہار کریں۔

میولود چاوش اولو نے مزید کہا کہ اقوام متحدہ کے ہائی کمشنر برائے انسانی حقوق کی طرف سے شائع کردہ تازہ ترین رپورٹ چین کے سنکیانگ ایغور خود مختار علاقے میں ایغور ترکوں کے خلاف انسانی حقوق کی خلاف ورزیوں کو واضح طور پر ظاہر کرتی ہے۔