بولٹ کے اکاؤنٹ سے ایک کروڑ 20 لاکھ ڈالر غائب

کنگسٹن: جمائیکا سے تعلق رکھنے والے عالمی شہرت یافتہ اتھلیٹ یوسین بولٹ کے اکاؤنٹ سے ایک کروڑ 20 لاکھ ڈالر غائب ہوگئے۔

رپورٹس کے مطابق اتھلیٹ کے وکلاء کا کہنا ہے کہ جمائیکا کے دارالحکومت کنگسٹن میں قائم ایک سرمایہ کاری فرم کے اکاؤنٹ سے یوسین بولٹ کے ایک کروڑ 20 لاکھ ڈالر غائب ہوگئے ہیں تاہم صرف 12 ہزار ڈالز باقی ہیں۔

بولٹ کے وکیل لنٹن پی گورڈن نے بتایاکہ اس اکاؤنٹ میں موجود پیسے اتھلیٹ کی ریٹائرمنٹ اور زندگی بھر کی بچت تھی۔ انہوں نے کہاکہ اگر کمپنی رقم واپس نہیں کرتی ہے تو ہم اس معاملے کو عدالت لیکر جائیں گے۔

دوسری جانب کنگسٹن میں قائم اسٹاکس اینڈ سیکیورٹیز لمیٹڈ نے اپنے بیان میں کہا ہے کہ ایک سابق ملازم کی جانب سے دھوکہ دہی کی سرگرمیوں کا علم ہوا ہے اور قانون نافذ کرنے والے ادارے معاملے کی تحقیقات کررہے ہیں۔

کمپنی کے ایک اعلیٰ عہدیدار نے بتایاکہ پولیس جلد ہی خاطی کو گرفتار کرلے گی۔